Нұр-Сұлтан, BAQ.KZ тілшісі. Мемлекет басшысы Қасым-Жомарт Тоқаев Орталық Азия елдеріне шекара маңы сауда-экономикалық хаб желісін құруды ұсынды.
Экономикалық әлеует пен тиімді географиялық орналасу басымдығын толыққанды пайдалану үшін құрылымдық және инфрақұрылымдық шектеулерді жою мақсатында тығыз өзара іс-әрекетті жолға қою маңызды. Орталық Азия елдерінің Бірыңғай тауар жөнелту жүйесінің тірек нүктесі қызметін атқаратын, келешекте одан ары кеңейтілу мүмкіндігі бар шекара маңы сауда-экономикалық хабының желісін іске қосу үшін пәрменді іс-шаралар қабылдау тиімді болар еді, - деді Қасым-Жомарт Тоқаев.
Президенттің мәлімдеуінше, қазақ-өзбек шекарасында «Орталық Азия» халықаралық өнеркәсіптік кооперация орталығы жобасы, қазақ-қырғыз шекарасында Индустриалды сауда-логистикалық кешені іске асырылып жатыр.
Тәжікстанмен көтерме-тарату орталықтарын құру туралы келісім бар. Ал Түрікменстанмен бірге астық терминалын салуды жоспарлап отырмыз. Бұл жобалар біздің өзара тауар айналымы көлемін арттыру, сонымен қатар ЕАЭО мен өзге елдердің нарықтарына өнімдерді экспортқа шығару ортақ мүддемізге жауап береді, - деді Қазақстан Президенті Орталық Азия мемлекеттері басшыларының IV Консультативтік кездесуінде.
