Бүгін Президент Қасым-Жомарт Кемелұлы Тоқаев отандық бизнес өкілдерімен кездесіп, қазіргі жаһандық экономикалық өзгерістер жағдайында ел алдында тұрған негізгі міндеттерді белгілеп берді. Сенат Төрағасы Мәулен Әшімбаев осыған орай пікір білдірді, деп хабарлайды BAQ.KZ.
Мемлекет басшысы атап өткендей, Қазақстан дәстүрлі тәсілдерді қайта қарауды және ескірген стереотиптерден бас тартуды талап ететін жаңа дәуірге қадам басты. Осы орайда экономиканы нығайту арқылы еліміздің өңірдегі көшбасшылық рөлін сақтау стратегиялық міндет ретінде айқындалды.
Сондай-ақ кездесуде ірі инфрақұрылымдық және өнеркәсіптік жобалар, цифрландыру және жасанды интеллект, көлік және логистика салалары экономиканы дамытудың басым бағыттарына айналуға тиіс екені айтылды. Осыған байланысты Үкіметке шағын және орта бизнесті қолдауды үнемі назарда ұстау міндеті жүктелді.
Президентіміз қоғамда қызу талқыланған қосымша құн салығының мөлшерлемесіне қатысты мәселеге де ерекше тоқталды. Мемлекет басшысы бұл бастама жан-жақты пысықталуы керек екенін айрықша атап өтті. Іс-шарада айтылғандай, қосымша құн салығы әртүрлі сала үшін мұқият саралануға және оның жоғарғы шегі тым жоғары болмауға тиіс, - деді Мәулен Әшімбаев.
Сонымен қатар Сенат төрағасы аталған бағыттағы жұмыстардың атқарылуына Сенат депутаттары да өз үлесін қосатынын жеткізді.
Осы мәселеге байланысты түпкілікті шешім білікті сарапшылар мен кәсіпкерлердің және депутаттардың пікірлері ескеріле отырып қабылданатын болды. Сондықтан алдағы уақытта бизнеске қолайлы жағдай жасайтын, сонымен бірге салық жүйесіндегі тәртіпті күшейтіп, бюджет кірісін арттыратын оңтайлы шешім қабылдауға баса мән беріледі. Бұл жұмысқа Сенат депутаттары да өз үлесін қосады.
Экономиканы жаңғырту жолында банк секторының рөлі аса маңызды. Сол себепті, Мемлекет басшысы қаржы институттарын нақты секторды дамытуға инвестиция салуға, несиелеудің жаңа тетіктерін енгізуге және кәсіпкерлерді қолдауға шақырды.
Президентіміз белгілеп берген міндеттерді іске асыру Қазақстанға өңірдегі көшбасшылық рөлін сақтауға және нығайтуға, орнықты экономикалық өсуді қамтамасыз етуге, сондай-ақ, отандық кәсіпкерлікті дамыту үшін қолайлы жағдайлар жасауға тың серпін беретіні анық. Сондықтан Сенат аталған бастамаларды заңнамалық қамтамасыз ету үшін белсенді жұмысын жалғастыра береді.
Алдағы уақытта мемлекет пен бизнестің серіктестігі одан әрі нығайып, экономиканы жаңғырту жолындағы бірлескен күш-жігер елдің өркендеуіне оң әсерін тигізеді деп сенеміз, - деді Сенат Төрағасы.
