Маңғыстау облысында тағы да итбалықтар менен құстар қырылғаны белгілі болды. Осы жолы Ақтау қаласынан солтүстікке қарай 38 шақырым жерде, "Caspiy life" демалыс базасына жақын орналасқан аумақта итбалықтар және құстардың өлекселері табылды, деп хабарлайды BAQ.KZ тілшісі.
Аталған оқиға бойынша Маңғыстау облыстық орман шаруашылығы және жануарлар дүниесі аумақтық инспекциясының инспекторлары Түпқараған ауданына барып, "Caspiy life" демалыс базасы аумағында тексеру жүргізді. Аймақты тексеру кезінде Каспий теңізінің жағасында 9 өлген құс табылған.
Осыған байланысты Маңғыстау облысы бойынша экология департаментінің зертханалық-талдамалық бақылау бөлімінің мамандары "Caspiy life" демалыс орнының жанында су сынамаларын алып жатыр. Әзірге құстар мен итбалықтардың неден қырылғаны белгісіз. Нәтижесі алдағы уақытта жарияланатын болады, - делінген облыстың Экология департаменті Facebook парақшасында таратқан хабарламасында.
Естеріңізге сала кетейік, 2024 жылы Маңғыстау облысы Түпқараған ауданында көктемде 180-нен астам итбалық қырылған еді. Ал күзде, қазан айының аяғында дәл осы Түпқараған ауданында Каспий жағалауында Қызыл кітапқа енген 151 итбалықтың өлексесі табылды. Бұдан бөлек Қарақия ауданындағы Құрық портына дейінгі аумақта жүзден аса итбалықтың қырылғаны есімізде. Жалпы саны мыңнан аса итбалықтың қырылу себебін мамандар әлі нақты айта алмай отыр.
Ал биыл қаңтардың екісінде жергілікті тұрғын "Rixos" қонақүйі орналасқан теңіз жағасынан өлген құстарды тапқан еді. Былтырдың өзінде Маңғыстаудағы Қаракөл жасанды көлінде мыңнан аса аққу қырылып қалды.
Жарас Мақсатұлы
