Нұр-Сұлтан, BAQ.KZ. Орталық ансамбль әртістері «Танк биатлоны» байқауына қатысқан қазақстандық жауынгерлерді Конституция күнімен құттықтады. Оларға алдағы сайыстарда табыс тілеп бірқатар танымал композицияларды орындады.
Бұл туралы Қорғаныс министрлігінің баспасөз қызметі хабарлады.
Біз барлық ойын қатысушыларын қарсы алғанымызға қуаныштымыз. Сайыста адал бәсекелестік пен жақсы өнер көрсетулеріне, елдеріміз арасындағы достықты нығайта түсулеріне тілектеспіз. Осындай айтулы мерекеге орай біздің командамызға танк биатлонында үлкен жеңістер тілейміз, - деді ансамбльдің көркемдік жетекшісі Әсем Шарифуллина.
Сонымен қатар, ансамбль әртістері өздерінің вокалдық шеберліктерімен Армия халықаралық ойындары өкілдерінің жүрегінен орын алды. Олар халық әндері мен қазақ фольклоры әуендерін орындаған таланттарымызды жылы қарсы алып, өз қошеметтерін білдірді.
Бүгін Қазақстаннан келген Армия халықаралық ойындарының қатысушылары мен олардың Ресейдегі шығармашылық ұжымы үшін ерекше күн. Мен барлық қазақстандықтарды ел Конституциясы күнімен құттықтаймын. Біздің достығымыз одан әрі де нығая берсін, - деді Ресей Федерациясы Қорғаныс министрлігі Мәдениет департаментінің бөлім бастығы, Еңбек сіңірген мәдениет қызметкері Ольга Фаллер.
Естеріңізге сала кетейік, Қазақстан танкішілері «Танк биатлоны» сайысы аясында 2 қыркүйекте жартылай финалдық эстафетада өнер көрсетеді.
