«Конституциялық Сотқа жүгіну құқығы – адамның және азаматтың құқықтары мен бостандықтарын қорғау институттарын құқықтық негізде нығайту» екендігін жазды ҚР Президенті жанындағы ҚСЗИ аға ғылыми қызметкері Гүлмира Тоқанова, деп хабарлайды BAQ.KZ.
Бүгін Президент Қ.Тоқаев биыл наурыз айында жарияланған саяси бастамаларды жүзеге асыруға бағытталған бірқатар заңнамалық актілерге қол қойды. Олардың айтарлықтай бөлігі азаматтардың құқықтары мен бостандықтарын конституциялық қорғау институттарын нығайтуға, оның ішінде «Прокуратура туралы» конституциялық заңға қатысты.
Құқықтарымыз бен бостандықтарымызды қорғау туралы айтатын болсақ, билікті бөлу жүйесінде соттардан басқа бұл маңызды функцияны прокуратура да атқаратынын түсіну керек. Ендігі жерде прокуратураның құқық қорғау әлеуеті конституциялық заңмен нығайтылды. Атап айтқанда, Бас прокурорға Конституция нормаларын түсіндіру, халықаралық шарттар мен нормативтік құқықтық актілердің Конституцияға сәйкестігі мәселелері бойынша Конституциялық Сотқа жүгіну құқығы берілді.
Сондай-ақ заңда адам және азаматтардың құқықтары мен бостандықтарын қорғау және қалпына келтіру бойынша прокуратураның Адам құқықтары жөніндегі уәкілмен, мемлекеттік органдармен, жергілікті өзін-өзі басқару органдарымен және басқа да ұйымдармен өзара іс-қимылы қарастырылған. Өзара әрекеттесу механизмінің құқықтық консолидациясы азаматтардың құқықтарын қорғауға біршама мүмкіндік береді.
Сонымен қатар заң прокуратураның заң шығарушылық қызметінің ашықтығын белгілейді. Енді Бас прокурордың азаматтардың құқықтарына, бостандықтары мен міндеттеріне қатысты нормативтік құқықтық актілері міндетті түрде жарияланады.
Бүгінгі таңда азаматтарды құқықтық қорғау саласында қабылданған заңнамалық актілер институттардың өзін нығайтуға да, азаматтардың құқықтары мен бостандықтарын қорғау рәсімдерін жетілдіруге де бағытталған. Бұл біздің елімізде ажырамас конституциялық азаматтық және саяси құқықтар мен бостандықтардың жалпы сақталуына оң әсер етуі тиіс.
