Алимент бойынша борышкерлер қылмыстық жауаптылыққа тартылды, деп хабарлайды BAQ.KZ тілшісі.
Алматы қаласының прокуратурасы кәмелетке толмағандардың алимент алу құқығын қорғау жөнінде белсенді жұмысты жалғастыруда.
Басым бағыттардың бірі – жосықсыз төлеушілердің, оның ішінде құмар ойындардан, букмекерлік кеңселерден, интернет-платформалардан (Яндекс Такси, InDriver) және электрондық әмияндардан (Simply) алынған кірістерін жасырып қалатын төлеушілердің міндеттемелерді орындауын қадағалау.
Прокуратура алимент бойынша 1 741 757 теңге қарызы бар, казинодан 4 миллион теңгеден астам ұтыс алған, бірақ үш айдан астам уақыт бойы міндеттемелерін орындаудан қасақана жалтарған борышкерді анықтады. Кәмелетке толмағандардың істері жөніндегі мамандандырылған ауданаралық соттың үкімімен ол ҚР ҚК-нің 139-бабында көзделген қылмыстық құқық бұзушылықты жасағаны үшін кінәлі деп танылып, бір жылға бас бостандығын шектеуге сотталған, - делінген хабарламада.
Тағы бір борышкерге қатысты осыған ұқсас бұзушылық анықталды, ол ресми жұмыспен қамтылуына және 3 099 255 теңге мөлшеріндегі берешегі барына қарамастан алимент төлемеген. Сот оны кінәлі деп танып, бір жылға бас бостандығын шектеу түріндегі жаза тағайындады.
Жалпы, қала прокуратурасының бастамасымен алимент төлеуден қасақана жалтару фактілері бойынша 14 сотқа дейінгі тергеп-тексеру басталды, оның 11-і айыптау үкімін шығарып, аяқталды.
Алматы қаласының прокуратурасының мәліметінше, сондай-ақ Әуезов ауданының прокуратурасы ұйымдардың басшылары мен бухгалтерлері тарапынан алименттерді қызметкерлердің жалақысынан өндіріп алу туралы сот орындаушыларының қаулыларын орындамаған немесе тиісті мәліметтер бермегені жөнінде бұзушылық фактілерін анықтады.
Нәтижесінде 10 бухгалтер мен ұйым басшылары айыппұл түрінде әкімшілік жауаптылыққа тартылды.
Алматы қаласының прокуратурасы, кәмелетке толмаған балаларды күтіп-бағу міндеті ата-аналарға жүктелгенін еске салады.
Алимент төлеуден жалтару әкімшілік (ҚР ӘҚБтК-нің 669-бабы) және қылмыстық (ҚР ҚК-нің 139-бабы) жауаптылыққа әкеп соғады.
0
0
0
0
0
