Нұр-Сұлтан, BAQ.KZ. Қызылорда облысында Тәуелсіздік мерекесіне орай Қазалы ауданында 150 орындық ауылдық клуб ашылды. Мәдени ошақ ұжымының алғашқы концертін тамашалауға арнайы барған аймақ басшысы Гүлшара Әбдіқалықова өнерпаздарды қолдау шаралары жан-жақты жүргізілетінін жеткізді, деп хабарлайды «Хабар 24».
2020 жылы құрылысы басталған 31 әлеуметтік нысанның 19-ы пайдалануға берілді. Олардың басым бөлігі шалғай елді мекендерде орналасқан.
Ақсуат ауылының тұрғындары 15 жылдай күткен өнер ордасында домбыра және қобыз үйірмелері өз жұмысын бастады. Сондай-ақ 30 мыңнан астам қоры бар кітапхана да алғашқы оқырмандарын қабылдады. Ақсуатта жалпы биыл бірнеше әлеуметтік нысан ел игілігіне берілген болатын.
Қазалы биыл алып құрылыс алаңына айналды. Аудан орталығында 4 пәтерлі 10 тұрғын үй салынып жатыр. Мемлекеттік бағдарламалар шеңберінде де ауқымды жобалар қолға алынған.
Бұның бәрі тәуелсіздік жемісі. «Нұрлы жер, Нұрлы жол, Жұмыспен қамту» жол картасымен биыл 9 мыңнан астам жұмыс орны құрылды. Сонымен қатар 40 млрд теңгеге жуық 4 бағыттағы нысандар жөндеуден өтіп, қайта салынды немесе жаңа құрылыстар енгізілді. Халықтың тұрмыс-тіршілігіне байланысты осындай жұмыстар әрі қарай жалғасатын болады, – деді облыс әкімі Гүлшара Әбдіқалықова.
«Ауыл – ел бесігі» бағдарламасы бойынша да Қазалының ауылдары абаттандырылып, ажарлана түсті. Келер жылы Кәукей, Сарыбұлақ, Шәкен, Майдакөл және Лақалы ауылдарында мәдениет үйлері салынады.
