Нұр-Сұлтан, BAQ.KZ. БҰҰ өкілдері Қарағанды облысындағы төтенше қауіпсіздік мекемесі мен әйелдер колониясына барды, деп хабарлайды Қарағанды облысы бойынша ҚАЖД баспасөз қызметі.
Халықаралық делегацияны Еуропалық Одақ Өкілдігінің Қазақстан Республикасындағы Елшісі, Нидерланды Корольдігінің Қазақстан Республикасындағы Елшісінің орынбасары және БҰҰ ЕҚБ штаб-пәтерінің өкілі таныстырды.
Сапардың негізгі мақсаты-Қарағанды және Павлодар облыстары бойынша ҚАЖД пилоттық пенитенциарлық мекемелеріндегі бағдарлама қызметінің өзекті нәтижелерімен таныстыру болды.
Аталған салаларда экстремистік және террористік бағыттағы қылмыстары үшін сотталғандармен жұмыс істеу және пенитенциарлық мекемелерде зорлық - зомбылық туғызатын радикалданудың алдын алу бойынша ЕО-БҰҰ және ҚР ІІМ Қылмыстық-атқару жүйесі комитетінің бірлескен бағдарламасы іске асырылуда. Қарағанды облысында осы бірлескен бағдарламаға 5 мекеме қатысады, онда төрт мыңнан астам сотталған, оның ішінде 60-қа жуық адам экстремизм мен терроризм үшін ұсталғандар.
Бағдарламаны БҰҰ-ның Есірткі және қылмыс жөніндегі басқармасы, БҰҰ-ның Терроризмге қарсы орталығы, БҰҰ-ның Терроризмге қарсы комитетінің атқарушы директоратымен бірлесе отырып, Еуропалық Одақтың, Нидерланды Үкіметінің қаржылық қолдауымен жүзеге асырады.
Жаһандық бағдарлама аясында Қазақстанға 1 200 000 доллар бөлінді, оның 500 000 доллары осы санаттағы сотталғандарды оңалту бағдарламаларын жүзеге асыру үшін қажетті мультимедиялық жабдықтарға, құрал-саймандар мен жиһаздарға жұмсалды.
Сондай - ақ, ЕО-БҰҰ мен ҚР ІІМ ҚАЖК арасындағы бірлескен бағдарлама аясында сотталғандардың тәуекелдері мен қажеттіліктерін бағалау бойынша бірлескен бағдарлама әзірленді, соның арқасында мекеме қызметкерлері жазаны өтеудің жеке жоспарларын әзірлей алады. Бұл Пенитенциарлық мекемелерде экстремистік идеологияның таралуының дер кезінде алдын алуға ықпал етеді, - деп хабарлады БҰҰ ЕҚБ бағдарламалық Кеңсесі басшысының м.а. Мадина Сариева.
Сарапшылар сотталғандарды оқыту және еңбекпен қамту мәселелеріне назар аударды, мысалы Қарағанды облысының әйелдер колониясында сотталғандар макияж және маникюр ісін оқиды.
