Халқымыздың дауысы қастерлі Отанымыздың тұғырын бекемдеуге тікелей ықпал етері анық – Тоқаев

Мемлекет басшысы Қасым-Жомарт Тоқаев Қазақстан халқына Құрылтай сайлауы қарсаңында жасаған үндеуінде әрбір қазақстандықтың дауысы қастерлі Отанның тұғырын бекемдеуге әсер ететінін айтты, деп хабарлайды BAQ.KZ.

Бұл туралы Ақорда мәлімдеді.

Құрметті отандастар, еліміздің келешегі әр азаматтың саналы таңдауына байланысты болмақ. Сайлауға қатысу дегеніміз – халықтың өз ықтиярын білдіру, ел тағдырына бей-жай қарамай, азаматтық жауапкершілік таныту, ел игілігі үшін өнегелі іс жасау деген сөз. Дүние жүзінде миллиондаған адам өз сайлау құқы үшін күресуде, - деді Мемлекет басшысы.

Сондай-ақ Президент әрбір қазақстандықты өз таңдауын жасауға шақырды.

Қазақта «Келісіп пішкен тон келте болмас» деген мақал бар. Азаматтарды, әсіресе, жастарды сайлауға келіп, өз таңдауын жасауға, яғни Қазақстанның табысты дамуына үлес қосуға шақырамын. Халқымыздың дауысы қастерлі Отанымыздың тұғырын бекемдеуге, нағыз озық ел болуымызға тікелей ықпал етері анық. Баршаңызға амандық және табыс тілеймін! Отанымыз – Қазақстан Республикасы жасасын! - деді Қасым-Жомарт Тоқаев.