Нұр-Сұлтан, BAQ.KZ тілшісі. 2019 жылғы 9 маусымда Қазақстанда президент сайлауы өтіп жатыр. Сайлау қалай өтіп жатыр? Келесі фотобаянда:
Сайлау учаскелерінің жұмысы мемлекеттік әнұранды орындаумен басталды.
Еліміз бойынша 9968 сайлау учаскесі бар.
Кезектен тыс президент сайлауы заңға сәйкес, Нұр-Сұлтан уақытымен сағат 07:00-де басталды, енді 20:00-ге дейін жалғасады.
Фото: интернеттен
Бүгін еліміздің барлық аймағында қоғамдық көліктер жолаушыларды тегін тасымалдауда.
Сайлауда алғаш рет дауыс беріп жатқан жастарға, сондай-ақ жасы үлкен ата-апаларымыз бен мүмкіндігі шектеулі жандарға арнайы сыйлықтар тапсырылуда.
Сағат 10.20-да Нұр-Сұлтандағы №52 сайлау учаскесіне ҚР Тұңғыш Президенті - Елбасы Нұрсұлтан Назарбаев дауыс беруге келді. Қасында ҚР Парламенті Сенатының төрағасы Дариға Назарбаева, елорда әкімі Бақыт Сұлтанов бар.
"Астана Опера" театрының әншілері дирижермен хор айтты.
Ал 9.30-да ҚР президенті Қасым-Жомарт Тоқаев №115 сайлау учаскесіне келіп, өз таңдауын жасады.
Сондай-ақ, Қазақстан президентіне үміткер кандидаттар өз таңдауларын жасады: Жамбыл Ахметбеков – "Қазақстан коммунистік халық партиясы", Еспаева – "Ақ жол" партиясы, Әміржан Қосанов – "Ұлт тағдыры" қозғалысы, Төлеутай Рахымбеков – "Ауыл" партиясы, Амангелді Таспихов – Қазақстан кәсіподақтар федерациясы, Қасым-Жомарт Тоқаев – Nur Otan партиясы, Сәді-Бек Түгел – "Ұлы дала қырандары" республикалық қозғалысы.
Қазақстан Республикасы Орталық сайлау комиссиясының 2019 жылдың 1 қаңтарындағы есебі бойынша 11 814 019 Қазақстан азаматының сайлауға дауыс беру құқығы бар.
2019 жылдың 9 маусымы сағат 14:00-де тізімге енгізілген сайлаушылардың 51,8%-ы дауыс берді.
ҚР ОСК ғимаратында әр сағат сайын сайлау барысы жайында есептік брифинг өтіп жатыр.
Ол жақта қазақстандық және шетелден келген 30-40-қа жуық журналист ақпарат таратуда.
Шетелдік байқаушылардың айтуынша, халық сайлауға белсенді қатысып жатыр.
2019 жылдың 9 маусымы сағат 16.00-ге келіп түскен ақпаратқа сәйкес, сайлаушылардың 65,9%-ы дауыс беріп үлгерді.
№142 сайлау учаскесінде жас жұбайлар некесін қиды.
Естеріңізге сала кетейік, сайлау учаскелері кешкі сағат 20.00 дейін жұмыс істейді.
Фото: Бауыржан ЖУАСБАЕВ, Артем ЧУРСИНОВ, Жамила МҰРЗАБЕКОВА
