Экология және табиғи ресурстар министрлігі "Ертіс орманы" мемлекеттік орман табиғи резерватында ағаш кесуге мүлде тыйым салуды жоспарлап отыр, деп хабарлайды BAQ.KZ.
Бұл тыйым 2029 жылдың 1 қаңтарына дейін әрекет етеді.
"Ертіс орманы" мемлекеттік орман табиғи резерваты республикалық мемлекеттік мекемесінің мемлекеттік орман қоры учаскелеріндегі екпелерде ағаш кесудің барлық түріне (өтімді қоқырсуды жинаудан, соқпақтарды шабудан және орманды күтiп-баптау мақсатында ағаш кесуден басқа) осы Бұйрық қолданысқа енгізілген күннен бастап 2029 жылғы 1 қаңтарға дейін тыйым салынсын, – деп жазылған Экология және табиғи ресурстар министрлігі Орман шаруашылығы және жануарлар дүниесі комитеті төрағасының бұйрығының жобасында.
2021 жылы орманның 1200 гектар аумағындағы ағаштар жанып кеткен болатын.
Еске салайық, "Ертіс орманы" мемлекеттік орман табиғи резерваты Шалдай және Бесқарағай орман шаруашылықтарынан, оның ішінде 16 орманшылықтан тұрады. Орман жамылғысының жалпы аумағы 177 мың гектар. Қорғалуы жағынан "Аса құнды орман алқаптары" санатына жатады. 2023 жылы Прокуратура "Ертіс орманы" мемлекеттік орман табиғи резерватында 331 текше метр көлемінде заңсыз ағаш кесілгенін анықтады.
Ал биылғы ақпанда "Ертіс орманы" табиғи резерватының басшысы пара алды деген күдікке ілінді.
