Түркияда антиүкіметтік наразылықтар күшейіп, оппозиция билікке жақын кәсіпкерлерге қарсы экономикалық бойкот жариялауға шақыруда, деп хабарлайды BAQ.KZ тілшісі The Guardian басылымына сілтеме жасап.
Түркиядағы басты оппозициялық күш – Халықтық-республикалық партиясының (ХРП) жетекшісі Озгюр Озел жақтастарын үкіметке жақын деп саналатын компаниялардың тауарлары мен қызметтерін тұтынудан бас тартуға шақырды. Ол әсіресе Doğuş Group конгломератын сынға алды. Бұл компания құрылыс, медиа, энергетика және жылжымайтын мүлік салаларында жұмыс істейді, сондай-ақ әйгілі Nusr-Et стейкхаус желісіне иелік етеді.
Бұл бойкот Стамбұл мэрі Экрем Имамоглудың қамауға алынуынан кейін басталған жаппай наразылықтардың жалғасы болып отыр.
Демонстранттар Ердоған билігінің демократиядан шегінуіне, сөз бостандығы мен әділ сот жүйесінің әлсіреуіне қарсы шықты. Наразылар үкіметшіл телеарналарға жарнама бермеуге және белгілі бір брендтерді тұтынбауға шақыруда.
Президент Режеп Тайып Ердоған бұл қозғалысты ел экономикасын әлсіретуге бағытталған әрекет деп атады. Алайда бойкотқа қосылған адамдар саны артып, наразылықтың жалғасуы Түркияда әлеуметтік шиеленістің күшейіп жатқанын көрсетеді.
1
0
0
0
0
