Қазақстанның Грузиядағы Елшісі Мәлік Мырзалиннің Патриарх тағының өкілдік міндетін атқарушы (уақытша патриарх), діни ортада Шио митрополит атымен белгілі Жоғары мәртебелі митрополит Элизбар Муджирмен кездесуі өтті, деп хабарлайды BAQ.KZ.
Кездесу барысында дінаралық диалог пен Грузияның 2025 жылы қыркүйек айында Астанада өтетін Әлемдік және дәстүрлі діндер лидерлерінің VIII съезіне қатысуының негізгі мәселелері талқыланды.
М. Мырзалин 2003 жылдан бері бейбітшілік, толеранттық және конфессияаралық келісім мәселелерін талқылау үшін маңызды халықаралық алаң қызметін атқарып келе жатқан Съездің негізгі міндеті туралы егжей-тегжейлі айтып берді. Ол сондай-ақ көпконфессионалды және көпұлтты қоғамда бейбітшілік пен келісімді сақтау үшін жұмыс істейтін әлемдік діндер көшбасшыларын, саясаткерлер мен ғалымдарды біріктіретін форум ретінде Съездің маңыздылығын атап өтті.
Грузияның VIII Съезге қатысуына ерекше назар аударылды. Қазақ дипломаты Грузияның Съезге жоғары деңгейде қатысуы Қазақстан мен Грузия арасындағы қарым-қатынасты нығайтудағы, сондай-ақ екі ел халықтарының мәдени және рухани байланыстарын кеңейтудегі маңызды қадам болатынын атап өтті. Съезд аясында бейбіт өмір мен діни төзімділік мәселелерін талқылау халықаралық тұрақтылық пен өзара сыйластықты нығайтуға септігін тигізеді, - деп жазды Сыртқы істер министрлігінің баспасөз қызметінен.
Митрополит Шио грузин тарапының алдағы іс-шараға белсене қатысуына зор қызығушылық танытып, осындай форумның конфессияаралық диалогты одан әрі дамыту және түрлі мәдениеттер мен діндер арасындағы бейбіт қарым-қатынастарды нығайту үшін маңызды екенін атап өтті. Ол Грузия рухани мұрасы бай және христиан дінінің көп ғасырлық тарихы бар ел ретінде руханилық пен бейбітшілік саласындағы халықаралық ынтымақтастықты кеңейтуге және тереңдетуге өз үлесін қосуға дайын екенін жеткізді.
Кездесу қорытындысы бойынша тараптар алдағы ынтымақтастыққа дайын екендігін білдіріп, 2025 жылы Әлемдік және дәстүрлі діндер лидерлерінің VIII съезінің жұмысына Грузияның қатысуын ұйымдастыру жөніндегі жұмысты жалғастыру жөнінде уағдаласты.
