Нұр-Сұлтан, BAQ.KZ. Елордадағы №2 көпбейінді балалар ауруханасындағы жедел хирургияның жедел жәрдем бөліміне ес-түссіз күйде жеткізілген 2015 жылғы қыз баланы дәрігелер аман алып қалды.
Бала дереу аппаратқа қосылды, жамбас мүшелерінің жарақаттарына шұғыл ота жасалған.
Қыркүйек айының басында елорда аумағындағы ауылдық жерлерде қайғылы оқиға орын алып, абайсызда екі баланы трактор басып кетті. Өкінішке орай, бір бала оқиға орнында қаза болып, екінші бала елордалық балалар ауруханасына жедел жеткізілді. Ауруханаға түскен бойда баланың жағдайы өте ауыр болғанын дәрігерлер де дәлелдеп отыр. Жедел хирургиялық көмек бөлімшенің деңгейінде науқасты хирургтар, нейрохирур, травматолог және реаниматологтар қарап шықты. Бала 10 күн жансақтау бөлімінде жатты.
Аурухананың травматолог дәрігері Мұхтар Ахмұрзаевтың айтуынша, қыз бала жарақаттық шок жағдайында түстікен.
Бала өте ауыр жағдайда, 3 дәрежелі жарақаттық шок жағдайында түсті. Мамандардың уақытылы жедел көмек көрсеткені аса маңызды болды. Бала аппаратқа қосылып, шокқа қарсы терапия жүргізілді. Шұғыл түрде ота жасау керек екені белгілі болды, - деді дәрігер.
5 жасар қыздың басынан өткен оқиға оның отбасы үшін қатты соққы болғаны сөзсіз. Баласын өлімнен құтқарғаны үшін дәрігерлерге шексіз алғыс білдіретін отбасы кішкентай науқастың жанында.
Қазір қызымның жағдайы жақсы. Көңіл-күйі де жақсы. Әкесімен видео байланыс арқылы телефонмен сөйлесіп тұрады. Барлық отбасы болып дәрігерлерге мың алғыс айтамыз. Бірінші Құдайдың қалауымен, екінші дәрігерлердің арқасында қызымыз қазір аман-есен қасымызда, - дейді қыздың анасы.
Қазір баланың жағдайы тұрақты.
Қыздың аман-есен шығуы үлкен қуаныш. Жамбас пен зәр шығару жолдары қатты зақымданған. Қазір баланың жағдайы тұрақты. Барлық процедураларды аяқтағаннан кейін бала үйге шығарылады, - деді хирургиялық бөлімінің басшысы Ринат Байгиреев.
