Елордалық ұйымдасқан қылмыстық топ жалған шот-фактуралар беру арқылы 1 млрд теңгеден астам салықты төлеуден жалтаруға көмектескен, деп хабарлайды BAQ.KZ ҚР ҚМА баспасөз қызметіне сілтеме жасап.
ҚМА елордалық департаменті жұмысты, қызмет көрсетуді және жүктерді жөнелтуді нақты орындамай, жалған шот-фактураларды жазып беру фактісі бойынша бір топ тұлғаға қатысты қылмыстық істі тергеуді аяқтады.
2021 жылғы қыркүйектен 2022 жылғы наурызға дейін бір топ тұлғалар мүліктік пайда алу мақсатында нақты қызметтер көрсетпей, жұмыстарды орындамай және тауарларды жөнелтпестен, бақылаудағы жеке кәсіпкерлік субъектілерінің атынан шот-фактуралар беру бойынша іс-әрекеттерді жасауға жәрдемдесті. Олар өз әрекеттерімен мемлекетке өтелмеген 1 млрд теңгеден астам салық сомасында аса ірі көлемде залал келтірген. Сот үкімімен ұйымдасқан қылмыстық топ мүшелері кінәлі деп танылып, 3,5 жылдан 4,5 жылға дейін бас бостандығынан айырылды, - деді ҚР ҚМА Ресми өкілі Әлібек Әбділов.
