Елімізде жер қойнауын пайдалану құқығын алу шарттары жеңілдетілді

21 Шілде 2022, 14:51
1027
Бөлісу:
Елімізде жер қойнауын пайдалану құқығын алу шарттары жеңілдетілді

Нұр-Сұлтан, BAQ.KZ. Қазақстанда көмірсутектер бойынша жер қойнауын пайдалану құқығын алу шарттары жеңілдетілді.

 Жер қойнауын пайдалану құқығын алу шарттарын оңайлату, сондай-ақ аукцион өткізу кезінде тұрақты бәсекелестік ортаны қалыптастыру мақсатында «Жер қойнауы және жер қойнауын пайдалану туралы» Қазақстан Республикасының Кодексіне мынадай өзгерістер мен толықтырулар енгізілді: 

1)   жыл ішінде өткізілетін аукциондар саны 2-ден 4 есеге дейін ұлғайтылды;

2) егер аукционның бастапқы жеңімпазы жер қойнауы және жер қойнауын пайдалану туралы заңнаманың аукцион жеңімпазына қойылатын талаптарын орындамаған жағдайда, аукцион жеңімпазынан кейін қол қойылатын бонустың ең көп мөлшерін ұсынған аукционға қатысушыға келісімшарт жасасу құқығын беру мүмкіндігі көзделген. 

Бұрын мұндай жағдайда жер қойнауы учаскесі аукционға қайта шығарылған болатын, бұл оны игеруге және игеруге тарту мерзімін ұлғайтты; 

3)  барлау кезеңінде жер қойнауы учаскесіндегі жұмыстар бойынша ең төменгі талаптарды орындау үшін қаржы қаражатының жеткіліктілігін растау ретінде банк шотының бар-жоғы және нөмірі туралы ақпарат, Банк шотындағы ақша қалдықтары туралы үзінді-көшірме немесе қаражат тарту туралы шарт түріндегі құжаттардың толық тізбесі көзделген;

4)  тең кепілдік жарна енгізіледі:

-  көмірсутектерді барлауға және өндіруге жер қойнауын пайдалану құқығы берілген жағдайда – Қазақстан Республикасының салық заңнамасына сәйкес айқындалған қол қойылатын бонустың бастапқы мөлшерінің екі еселенген мөлшеріне тең сомаға;

- көмірсутектерді өндіруге жер қойнауын пайдалану құқығы берілген жағдайда – Қазақстан Республикасының салық заңнамасына сәйкес айқындалған қол қойылатын бонустың бастапқы мөлшерінің бір еселенген мөлшеріне тең сомаға; 

5) өтініш беруші Мемлекеттік органдардың ақпараттық жүйелерінде бар ақпаратты ұсынбайды.

Бұл түзетулер 2023 жылғы 1 қаңтардан бастап қолданысқа енгізіледі.

Өзгелердің жаңалығы