Алматыда Қаржыгерлердің XI конгресінде Ұлттық төлем корпорациясы, Visa және қазақстандық үш банк тұңғыш цифрлық теңгенің төлем карталарын іске қосты, деп хабарлайды BAQ.KZ.
Цифрлық теңге Қазақстанның Ұлттық банкінің цифрлық валютасына байланған және Visa төлем технологияларының үйлесімділігін қамтамасыз етеді.
Жаңа төлем карталары Visa карталарын қабылдайтын кез келген төлем терминалдарында қабылданады. Цифрлық теңгені енгізудің бірінші кезеңінде CBDC-карталар ұлттық төлем корпорациясының қызметкерлеріне қолжетімді болады.
Цифрлық теңге әлеуметтік төлемдерді неғұрлым тиімді және жылдам бөлуге, мемлекеттік қаражаттың қозғалысын оңтайландыруға бағытталған.
Цифрлық теңге – қолма-қол ақша мен ақшасыз төлемдерге қосымша ұлттық валютаның үшінші формасы. Ол инновациялық қаржылай сервиске арналған блокчейн технологияларының потенциалын ашады, мемлекеттік шығындардың атаулы сипаты мен тиімділігін қамтамасыз етеді және дәстүрлі қаржы мен цифрлық активтердің әлемінің ортасына «көпір» салады, – деді Қазақстанның Ұлттық төлем корпорациясының басқарма төрағасы Бинұр Жәленов.
Орталық және Шығыс Еуропа, Таяу Шығыс және Африка аймағындағы Visa компаниясының президенті Эндрю Торренің айтуынша, цифрлық теңгеге байланған бірінші картаны шығару ақша эволюциясындағы қызықты кезең және инновациялар мен цифрлық төлемдердің қолжетімділігін ілгерілетуде мемлекеттік және жеке секторлар серіктестігінің маңыздылығын көрсетеді.
