Алматы облысының полиция қызметкерлері екі кісіні өлтірді деген күдікке ілінген шетелдік азаматты ұстады, деп хабарлайды BAQ.KZ.
Естеріңізге сала кетейік, 26 маусым күні Қарасай ауданының ПБ-ға жеке үйлердің бірінен пышақ жарақаты бар екі ер адамның мәйіті табылғандығы туралы хабарлама келіп түсті.
Табылған мәйіттер 30 бен 34 жастағы Тәжікстан Республикасының азаматтары болғандығы анықталды. Осы қылмыстық құқық бұзушылықты жасады деген күдікке 43 жастағы сол республиканың азаматы ілінді. Жедел-іздестіру іс-шарасы барысында полиция қызметкерлері күдіктінің орналасқан жерін анықтап, оны ұстады. Қазіргі уақытта ол уақытша ұстау изоляторына қамаққа алынды, - деп хабарлады Алматы облысы ПД бастығы Бауыржан Әленов.
Іс негізінде сот-медициналық сараптама тағайындаумен сотқа дейінгі тергеу амалдары жүргізіліп жатыр. Тергеу мүддесі үшін өзге ақпарат жария етілмейді.
