Ауыл шаруашылығы министрлігі биылғы жылдың көктемгі егіс және егін жинау жұмыстарын ерте қаржыландыруды қамтамасыз ету мақсатында іс-шараларды қабылдап жатыр, деп хабарлайды BAQ.KZ.
Бюджеттік кредит шеңберінде 15 млрд. теңге мөлшеріндегі бірінші транш бағдарлама операторы – «Аграрлық несие корпорация» АҚ-ға жіберілді.
Айта кету керек, жалпы алғанда, 2024 жылы көктемгі егіс және егін жинау жұмыстарын жеңілдетілген кредит беру үшін 140 млрд. теңге көлемінде бюджет қаражаты қарастырылған, бұл кем дегенде 2 млн гектар алқапқа егуді қамтамасыз етуге мүмкіндік береді.
Бағдарлама кредит беру мерзімі 2025 жылғы 1 наурызға дейін (негізгі қарыз пен сыйақы сомасының 50%-ын 2024 жылғы 1 желтоқсанға дейін, қалған 50%-ды 2025 жылғы 1 наурызға дейін) теңгемен жылдық 5%-дан аспайтын мөлшерлеме бойынша түпкілікті қарыз алушы – АӨК субъектісі үшін қарыздар беруді көздейді. Осының арқасында шаруалар егінді келесі жылдың 1 наурызына дейін өздері үшін оңтайлы жағдайда сатып және барынша пайда алады. Бұл ретте өтеудің түпкілікті кестелері шаруалардың қарыз шарттарын жасасу кезінде жеке тәртіппен қалыптастырылады, - делінген хабарламада.
Бұдан басқа, осы бағдарламаны іске асыру кезінде кең қамтуды қамтамасыз ету үшін «Аграрлық несие корпорациясы» АҚ қаржы институттарын қорландыруды жүзеге асырады. Осылайша, жеңілдікті қарыздарды тікелей беру өңірлерде екінші деңгейдегі банктер, кредиттік серіктестіктер, микроқаржы ұйымдары және өңірлік инвестициялық орталықтар арқылы жүргізіледі.
Егіс науқаны оңтайлы агротехникалық мерзімде өтуі үшін АӨК субъектілерінен қаржыландыруға өтінімдерді қабылдау 2023 жылдың желтоқсанында басталды. Бүгінгі таңда өңірлердегі фермерлерден келіп түскен жалпы өтінімдердің пулы 458 бірлікті, яғни шамамен 20,3 млрд теңгені сомасына қаржыландыруды құрайды. Оның ішінде 9,4 млрд теңгеге 200-ден астам өтінім мақұлданды. Еске сала кетейік, 2023 жылдың қорытындысы бойынша, 3,5 млн га егіс алқаптарын қамти отырып, 3 796 ауыл шаруашылығы тауарын өндірушіге кредит берілді, - делінген хабарламада.
Сондай-ақ фермерлердің қарыздарын ұзартуды ұсыну арқылы өткен жылғы ауыл шаруашылығы маусымының қолайсыз ауа райы жағдайларының салдарын жою жөніндегі іс-шаралар жалғасып жатыр. 2024 жылғы 19 қаңтарға «Аграрлық несие корпорациясы» АҚ мен «ҚазАгроҚаржы» АҚ-ға 51,2 млрд теңге сомасына 1 145 АШТӨ-ден ұзартуға арналған құжаттардың толық пакетімен өтініштер келіп түсті, оның ішінде 46,1 млрд теңгеге 1 061 өтінім ұзартуға мақұлданды, 5,1 млрд теңге сомасына тағы 84 өтінім қаралып жатыр.
Бұдан басқа, бұған дейін Ауыл шаруашылығы министрлігі сыйақы мөлшерлемелерін субсидиялау шарттарына өзгерістер енгізген болатын, бұл қарыз алушы үшін қиындық тудыратын мән-жайлардың басталуына байланысты сыйақы мөлшерлемесін төлеу және (немесе) негізгі борышты өтеу бойынша кейінге қалдыру мерзімін 10 айдан 24 айға дейін ұзартуға мүмкіндік береді. Тиісті түзетулер ағымдағы жылдың 15 қаңтарында күшіне енді.
«Кең дала» көктемгі дала және егін жинау жұмыстарына кредитт беру бойынша жеңілдікті бағдарлама мен мерзімін ұзарту шаралары шеңберінде бюджеттік кредитті қайта құрылымдау жүргізілді, бұл бағдарлама қатысушыларына 2023 жылғы қарыздарды айыппұл санкцияларын қолданбай-ақ ұзартуды жүзеге асыруға мүмкіндік берді.
