Жаңа оқу жылының басталуына арналған педагогтердің тамыздағы дәстүрлі басқосуы өз мәресіне жетті. Талқылаудың негізгі тақырыбы – оқу үдерісін цифрландыруға және сабақ беру процесіне әлемдік тәжірибені ескере отырып, жасанды интеллектті енгізу ерекшеліктері, деп хабарлайды BAQ.KZ.
Назарбаев Университетінің базасында өткен отырыстың пленарлық бөлігіне ҚР Премьер-Министрінің орынбасары Тамара Дүйсенова, оқу-ағарту, ғылым және жоғары білім министрлері, ҚР Парламентінің Мәжіліс және Сенат депутаттары қатысты.
Оқу-ағарту министрі Ғани Бейсембаев отандық білім беру жүйесінде жасанды интеллекті енгізудің алғышарттары қалыптасқанын атап өтті. Бүгінде мектептерде жоғары жылдамдықты интернетпен қамту 89%-ды құрайды, интернеттің орташа жылдамдығы өткен жылғы 4 Мбит/с-тен биыл 75 Мбит/с-ке жетті. Еліміздің 1731 мектебінде Starlink жерсеріктік интернеті орнатылды.
Жасанды интеллект технологияларын білімге сауатты енгізу – оқытудың тиімділігін, жеке оқушыға бағыттылығын қамтамасыз етеді, ал бұл өз кезегінде білім сапасын жақсартуға мүмкіндік береді. Заманауи технологиялар педагогтерден білім беру процесін ұйымдастыруда жаңа ұстанымды талап етеді және оны тиімді қолдануға білім берудің барлық деңгейлері дайын болуы тиіс, - деп мәлімдеді министр.
Ол Мемлекет басшысының қолдауының арқасында білім беру инфрақұрылымы жақсарғанын атап өтті. Бүгінде елімізде 3 мыңға жуық мектеп бір ауысымда білім беруде. Қосымша 536 оқушы орнына арналған 302 мектептің құрылысы жүруде. 1,7 миллионнан астам оқушы ыстық тегін тамақпен қамтылды.
Сондай-ақ Ғани Бейсембаев кадрлық әлеуетті арттыру мәселесіне тоқталды. Оның айтуынша, жыл сайын мұғалім мамандығына қызығушылық білдірушілердің қатары артып келеді. Биылғы жылдың өзінде 1797 «Алтын белгі» иегері педагогика мамандығын таңдаған, бұл өткен жылмен салыстырғанда 269 адамға көп.
Біз осы қол жеткізген жетістіктерде тоқтап қалмауымыз керек. Алдымызда білім беру саласын әлі де жетілдіру мен дамытуды талап ететін жаңа міндеттер тұр. Бұл білім сапасын арттыру, инклюзивтілікті нығайту және білім беруді барлық балалар үшін қолжетімді ету, сондай-ақ олардың қауіпсіздігін қамтамасыз ету. Әрбір мектеп баланың қарым-қабілетін танып, тұлғалық дамуына жол ашатын жайлы білім беру ортасына айналуы тиіс, - деді министр.
Министр келесі оқу жылында басымдық берілетін маңызды міндеттерді атап көрсетті. Бұл – балалардың қауіпсіздігін қамтамасыз ету, мектептердің ішкі регламенті мен Жарғысының сақталуы, білім алушылардың оқу үлгерімі және т.б.
Пленарлық отырыс халықаралық сарапшылардың қатысуымен дискуссиялық форматта жалғасты. Сонымен қатар «Мектепке дейінгі білім берудегі инновациялар», «Жасанды интеллектті орта білім беру жүйесіне интеграциялау», «Техникалық және кәсіптік білім беру жүйесініндегі цифрландырудың заманауи трендтері», «Ауыл мектептерінде оқыту процесін цифрландыру», «Цифрлық мектеп– цифрлық мұғалім», «Мұғалімдердің цифрлық құзыреттілігін дамыту», «Цифрландыру жағдайындағы инклюзивті білім беру», «Балалардың құқықтарын қорғау саласындағы цифрландыру», «Біртұтас тәрбие және қосымша білім синергиясы», «Цифрландыру жағдайындағы білім беру мазмұнына тұрақты даму компонентін интеграциялау», «Цифрлық технологиялар мен жасанды интеллекттің балалардың әл-ауқатына әсері» тақырыптық бағыттары бойынша пленарлық секциялық отырыстар өтті.
Саммит аясында білім беру саласын жетілдіру мен дамыту бойынша цифрлық шешімдердің сандық көрмесі ұйымдастырылды. Сондай-ақ «Әлем мұғалімі» жаһандық премиясының (Global Teacher Prize) ұлттық кезеңінің жеңімпаздары таныстырылды.
Саммит соңында Оқу-ағарту министрі білім беру саласының дамуына үлес қосқан үздік педагогтерді ведомстволық наградалармен марапаттады.
