Бұл туралы Мәжілістің комитет отырысында депутат Нартай Аралбайұлы айтты, деп хабарлайды BAQ.KZ тілшісі.
Премьер-лигамыздың букмекерлік кеңселердің атымен аталуы ешкімнің ақылына кіріп-шықпайтын дүние. Ешқандай елдің, көрші елдерді, басқа да елдерді алып қарайық, премьер-лигасында ондай жоқ. Депутаттар заңға осы нормаларды ұсынады. Оны дайындап жатырмыз. Сондықтан сіз (Туризм және спорт вице-министрі Серік Жарасбаев – ред.) нақты ұстанымыңызды айтсаңыз: букмекерлік кеңсені Қазақстан премьер-лигасының атауынан алып тастау туралы норманы қолдайсыздар ма, жоқ па? – деп сұрады Нартай Аралбайұлы министрлік өкілінен.
Туризм және спорт вице-министрі Серік Жарасбаев депутаттың сұрағына жауап беріп, ұсынысты қолдайтынын айтты.
Әрине, ондай ұсынысты біз (Туризм және спорт министрлігі – ред.) қолдаймыз, - деп айтты вице-министр.
Мәжілістің Әлеуметтік-мәдени даму комитетінің отырысында Туризм және спорт вице-министрі Серік Жарасбаев «Қазақстан Республикасының кейбір заңнамалық актілеріне дене шынықтыру және спорт, сондай-ақ нормалардың артық (шамадан тыс) заңнамалық регламенттелуін болғызбау мәселелері бойынша өзгерістер мен толықтырулар енгізу туралы» заң жобасын таныстырған болатын.
