Дүниежүзілік жануарлар денсаулығы ұйымының (ДДСҰ) Орталық Азия бойынша субөңірлік өкілдігі құрылғанына 10 жыл толуын атап өтуде, деп хабарлайды BAQ.KZ.
Іс-шараға ҚР АШМ вице-министрі А.Б. Бердалин, Қазақстандағы ДДҰ Кеңсесінің Басшысы Скендер Сила, Өзбекстан, Қырғызстан және Тәжікстан ветеринариялық қызметтерінің басшылары, сондай-ақ ҚР АШМ Ветеринариялық бақылау және қадағалау комитетінің және ведомстволық бағынысты ұйымдардың өкілдері қатысты.
ДДСҰ - 1924 жылы 25 қаңтарда Париж қаласында Халықаралық Эпизоотиялық Бюроның органикалық статутын қоса бере отырып, Халықаралық эпизоотиялық бюро құру туралы Халықаралық келісім негізінде құрылған, бүкіл әлемдегі жануарлардың денсаулығын қорғауға жауапты үкіметаралық ұйым.
ДДСҰ негізгі мақсаты мемлекеттердің құрылысы мен экономикалық жағдайына қарамастан бүкіл әлемде жануарлардың денсаулығын қорғауға және қамтамасыз етуге бағытталған. ДДСҰ жүзеге асыратын негізгі функциялар:
1) эпизоотиялық ақпарат беру;
2) ветеринариялық қызметтердің қызметін жақсарту жөніндегі ұсынымдар;
3) халықаралық нормаларды, қағидаларды, стандарттар мен ұсынымдарды әзірлеу.
Мүше мемлекеттер үшін ДДСҰ маңыздылығы мыналарды көрсетуде:
* барлық индустрияландырылған және дамушы елдердің Дүниежүзілік жануарлар нарығына және мал шаруашылығы өнімдеріне олардың эпизоотиялық саламаттылығына қарай, ДДСҰ талаптарын сақтай отырып, тең құқықты шығуына жәрдемдесу;
* жануарлардың денсаулығын, тамақ өнімдерінің қауіпсіздігін қамтамасыз етуде әдістемелік және консультациялық көмек;
Қазіргі уақытта әлемнің 183-тен астам елі ДДСҰ мүшелері болып табылады.
Қазақстан Республикасы 1993 жылдан бастап ДДСҰ -ға қосылды.
2011 жылдан бастап ДДСҰ - мен ынтымақтастық бойынша белсенді жұмыс жүргізілуде.
ДДСҰ бас директоры доктор Бернард Валлдың Қазақстан Республикасына ресми сапары барысында 2012 жылғы 9-13 шілде аралығында Қазақстан Республикасының Үкіметі мен ДДСҰ арасындағы ветеринария саласындағы ынтымақтастық бағдарламасы туралы келісімге қол қойылды.
2013 жылғы 16 қазанда Астана қаласында Дүниежүзілік жануарлар денсаулығы ұйымының аусыл бойынша субөңірлік үйлестіру кеңсесін құру туралы Қазақстан Республикасының Үкіметі мен ДДСҰ арасында келісімге қол қойылды.
Он жыл ішінде субөңірлік өкілдік Орталық Азия елдеріне жануарлар ауруларымен күресуде, азық-түлік қауіпсіздігін қамтамасыз етуде және жануарлардың әл-ауқатын арттыруда айтарлықтай қолдау көрсетті.
Атап айтқанда, өкілдік:
Жануарлардың ауруларымен, соның ішінде аусылмен, бруцеллезбен, шошқа обасымен және басқа да қауіпті инфекциялармен күресудің ұлттық жоспарларын әзірлеуге және іске асыруға көмек көрсетті.
Ветеринария мамандары мен басқа да мүдделі тұлғаларға арналған бірқатар білім беру іс-шаралары өткізілді.
Орталық Азия елдері арасындағы ветеринария саласындағы ынтымақтастықты дамытуға ықпал етті.
Қазақстанда субөңірлік өкілдік Ветеринариялық бақылау және қадағалау комитетіне (ВБҚК) айтарлықтай қолдау көрсетті. Атап айтқанда, өкілдік:
аусыл ауруын бақылауды күшейту;
өңірлік деңгейде осы аурумен күрес жөніндегі бірыңғай тәсіл мен стратегияны әзірлеу;
Орталық Азия өңірі ауқымында аусылға қарсы күрес жөніндегі ветеринариялық қызметтердің ДДСҰ өңірлік және арнайы комиссияларымен бірлесіп ынтымақтастығын және күш-жігерін біріктіруді қамтамасыз ету.
АШМ Ветеринариялық бақылау және қадағалау комитетінің ветеринариялық мамандарына, оның ішінде жануарлардың қауіпті ауруларын диагностикалау және емдеу мәселелері бойынша бірқатар білім беру іс-шараларын өткізді.
АШМ Ветеринариялық бақылау және қадағалау комитеті мен өңірдегі басқа да ветеринариялық ұйымдар арасындағы ынтымақтастықты дамытуға ықпал етті.
ДДСҰ қолдауының арқасында Қазақстанның ветеринариялық бақылау және қадағалау комитеті жануарлар ауруларымен күресте айтарлықтай жетістіктерге жетті. Атап айтқанда, Қазақстанда аса қауіпті аурулар бойынша жануарлар арасында сырқаттанушылықты азайтуға, тамақ өнімдерінің қауіпсіздігін арттыруға және жануарлардың әл-ауқатын жақсартуға қол жеткізілді.
Біз соңғы 10 жылда алған техникалық қолдауымыз үшін ДДСҰ – ға өте ризамыз, - деді Қазақстанның ветеринариялық бақылау және қадағалау комитетінің басшысы Бауыржан Абызбаев.
ДДСҰ қолдауының арқасында біз Қазақстанды жануарлар мен адамдар үшін қауіпсіз ете алдық, - деп қосты ол.
