Нұр-Сұлтан, BAQ.KZ. Денсаулық сақтау жүйесі әрқашан балалардың игілігі мен денсаулығы үшін жұмыс істеді. Денсаулық сақтау министрі Алексей Цой осылай деді.
Өмірде әркімнің ең баға жетпес құндылығы – бұл біздің ата-аналар мен балалар. Біз олар үшін жасай алатын ең кішкентай нәрсе - олардың денсаулығын мүмкіндігінше ұзақ сақтау және қорғау. Осыған байланысты денсаулық сақтау министрлігімен көп жұмыс жасалды. Бірақ, қол жеткізілген нәтижелерге қарамастан, бұл бағыттағы жұмыс үнемі жалғасуда - деді министр.
Ол бүгінгі Балаларды қорғау күні мерекесі қарсаңында жақсы жаңалықтармен бөліскісі келетінін айтты.
Өткен 2020 жыл біз үшін үлкен сынақ қана емес, сонымен бірге өзгерістер кезеңі болды. 1987 жылдан бері алғаш рет елімізде демографиялық күрт өрлеуді байқадық. Бала туу көрсеткіші бірден 4,7%-ға өсті. Бала туудың жоғары болуы аясында, пандемия және денсаулық сақтау жүйесінің шамадан тыс жүктелуі жағдайындағы қауіп-қатерлерге қарамастан, біз нәрестелер өлім-жітімінің көрсеткішін 7,1%-ға айтарлықтай төмендеттік. ДДҰ ұсынған тиімді перинаталды технологияларды және реанимацияның заманауи әдістерін қолдану арқылы шала туылған нәрестелердің өмір сүру деңгейі 80%-ға дейін өсті - дейді Алексей Цой.
Ол қаншалықты қиын болғанына қарамастан, балаларды тек емшек сүтімен қамтуды 85,6%-ға жеткізгендерін атап өтті.
ЮНИСЕФ-тің ұсынысы бойынша емшек емізуді қолдау үшін 33 медициналық ұйымға «Балаға достық қатынас ауруханасы» мәртебесі берілді. Сонымен қатар, ата-аналарға қолдау көрсету мақсатында бүкіл ел бойынша 520-дан астам баланы дамыту кабинеттері ұйымдастырылды, онда ерте жастағы балаларды күту мәселелері бойынша тегін кеңес алуға болады. Балалардың денсаулық жағдайын жақсарту, ауруларды, даму бұзылыстарын уақтылы анықтау және нәресте өлімін азайту үшін біз үнемі жүйелі шараларды жүзеге асырып келеміз. Мәселен, соңғы жылы 4,4 млн бала кәсіби тексерулермен, 900 мыңнан астам бала скринингтермен қамтылды. Балалардың 90,7%-ы 12 инфекциялық вакцинамен басқарылатын ауруларға қарсы профилактикалық иммундаумен қамтылған. 880 мыңға жуық бала тегін дәрі-дәрмекпен қамтамасыз етілді - деді ол.
МӘМС енгізудің арқасында мектеп медицинасын қаржыландыру 2,6 есеге артты.
Жан басына шаққандағы нормативтің ұлғаюы есебінен әрбір оқушыға арналған медициналық кабинеттердің жабдықталуы жақсарды, Дәрігерлермен жабдықталу артты, кешенді тексеру, тістерді емдеу және алдын алу үшін 367 мектеп стоматологиялық кабинеті ашылды. Естеріңізге сала кетейік, 18 жасқа дейінгі барлық балалар, ал бұл 6,5 млн-нан астам азамат, мемлекет есебінен медициналық сақтандыру жүйесінде сақтандырылған және медициналық қызметтердің барлық түрлеріне толық қол жеткізе алады - дейді министр.
Бейінді қызметтер, соның ішінде неонаталдық хирургия да балалардың денсаулығын жақсартуға өз үлесін қосты.
Жыл сайын Қазақстанда туа біткен даму кемістігі бар жаңа туған нәрестелерге 1 мыңнан астам жедел араласу және туа біткен жүрек кемістігі бар балаларға 2 мыңнан астам кардиохирургиялық операция жүргізіледі, олардың 77%-ы - бұрын шетелге емделуге жіберілген өмірінің бірінші жылындағы балалар. Жүргізіліп жатқан операциялардың тиімділігі өте жоғары. Диагностика мен емдеудің жаңа әдістерін, химиялық препараттарды қолдану өмір сүру сапасын жақсартуға және онкологиялық аурулары бар балалардың жалпы өмір сүруін арттыруға мүмкіндік берді. 2012 жылдан бастап гемопоэтикалық дің жасушаларын 245 транспланттау жүргізілді, бұл ретте транспланттаудан кейін өмір сүру деңгейі 65,8%-ды құрады, бұл әлемдік деректермен салыстырғанда жақсы нәтиже - дейді Цой.
Оның сөзіне қарағанда, мүмкіндігі шектеулі балалар да назардан тыс қалмайды.
Оларға қажетті көмек көрсету үшін балаларды оңалту қызметі дамуда. Елімізде 34 оңалту орталығы жұмыс істейді, оның 3-і республикалық деңгейде. Тұңғыш Президент қорының бастамасымен «Қамқорлық» жол картасы аясында 8 оңалту орталығы ашылды. Балаларды оңалтуды қаржыландыру МӘМС енгізу есебінен екі есеге дерлік ұлғайды. Бұл төсек-орын қорын 45,6%-ға кеңейтуге және қалпына келтіру емі мен медициналық оңалту қызметтерінің қолжетімділігін 22%-ға жақсартуға мүмкіндік берді. Біз балаларымыздың игілігі үшін әрі қарай жұмыс істеуге, барлық бағыттар бойынша көрсеткіштерді жақсартуға ниеттіміз. Біздің дәрігерлер күні-түні еліміздің кішкентай азаматтарының денсаулығын қорғауда - деді Алексей Цой.
