Нұр-Сұлтан, BAQ.KZ. Бірыңғай жинақтаушы зейнетақы қоры ағымдағы жылдың он бір айында (01.01.2021- 01.12.2021 аралығындағы кезеңде) салымшыларына 36,3 миллион қызмет көрсетті.
Бұл өткен 2020 жылдың сәйкес кезеңімен салыстырғанда 42,5% көп.
БЖЗҚ қызметтерінің 90%-дан астамын пандемия кезеңінде ыңғайлы, жедел және қауіпсіз олып табылатын онлайн тәртібінде көрсетуде. Салымшылар мен алушылар үйден шықпай-ақ бірнеше минут ішінде Қордың барлық қызметтерін ала алады. Онлайн қызметтердің 26,6 миллионнан астамы немесе жалпы көлемнің 73,3% БЖЗҚ сайтында немесе мобильді қосымшасында көрсетілген. Өткен жылмен салыстырғанда көрсеткіштер бір жарым есеге жуық өсті (өткен жылдың 11 айында Қор салымшылары виртуалды кеңістікте 16,1 млн қызмет алған болатын).
БЖЗҚ сайтында да, ұялы қосымшасында да бар Жеке кабинеттің көмегімен салымшылар қызметтерді қалаған уақытында, кез-келген жерде ала алатынын естеріңізге саламыз. Атап айтқанда, бұл қызметтер жеке зейнетақы шотынан үзінді көшірме алу, өз деректемелеріне өзгерістер мен толықтырулар енгізу, ЖЗШ-ның болуы туралы анықтама алу, мерзімсіз уақытқа 1 немесе 2 топтағы мүгедектіктің белгіленуіне байланысты зейнетақы төлемдерін тағайындау туралы өтініш беру, төлемге берілетін өтініштің мәртебесін қадағалау және тағы басқалар.
Сонымен қатар, қызмет көрсетудің өтінімсіз түрі де дамыған. Оған, мысалы, міндетті зейнетақы жарналарын (МЗЖ), міндетті кәсіптік зейнетақы жарналарын (МКЗЖ) және ерікті зейнетақы жарналарын (ЕЗЖ) есепке алу бойынша жеке зейнетақы шоттарын автоматты түрде ашу кіреді. Естеріңізге сала кетейік, жеке тұлғаның БЖЗҚ-да ашық ЖЗШ болмаған жағдайда, ол алғашқы жарна келіп түскен кезде БЖЗҚ ақпараттық жүйесінде автоматты түрде ашылады. Бұл ретте тұлғаның жеке басын сәйкестендіру МЗЖ, МКЗЖ немесе ЕЗЖ аудару кезінде төлем тапсырмасының электрондық форматында көрсетілген дербес деректер бойынша жүзеге асырылады. БЖЗҚ салымшысының қолданыстағы құжатының деректемелері мен тұрғылықты жері туралы барлық қажетті мәліметтер Мемлекеттік органдардың ақпараттық жүйесінен алынады. Жыл басынан бері 6,2 миллион қызмет немесе жалпы көлемнің 17,1% өтінімсіз көрсетілген.
Кеңсеге келіп қызмет алу түрі де танымалдығын жоғалтқан емес. Бүкіл Қазақстан бойынша БЖЗҚ-ның 183 бөлімшесінде салымшыларға 1 996 118 қызмет көрсетілді, бұл өткен жылмен салыстырғанда екі есеге артық. Естеріңізге сала кетейік, Қордың жақын жердегі бөлімшесі туралы www.enpf.kz сайтынан немесе ENPF мобильді қосымшасы арқылы тез білуге болады.
«БЖЗҚ» АҚ мен «Қазпошта» АҚ-ның шалғайдағы елді мекендерде орналасқан ұлттық пошта операторының бөлімшелерінде көрсетілетін қызмет түрлері бойынша бірлескен жобасының арқасында Қор салымшыларына 2021 жылдың 1 желтоқсанындағы жағдай бойынша, пошта операторының 347 бөлімшесінде 16 736 қызмет көрсетілді. Ол өткен жылмен салыстырғанда үш есе көп.
Қорда, сондай-ақ, барып қызмет көрсету бөлімдері де іске қосылған. Олар қатаң санитарлық-эпидемиологиялық шараларды сақтай отырып жұмыс істейді. Бұл ретте алдын ала кеңес беру (оның ішінде қызметтерді онлайн алу мүмкіндігін тексеру) жүзеге асырылады. 2021 жылдың 1 желтоқсанына барып қызмет көрсету барысында 16 736 операция жүзеге асырылды, бұл былтырғы дәл осы кезеңмен салыстырғанда 30%-ға асып түседі.
БЖЗҚ сапалы кеңес беру қызметтерін ұсынуға және Қордың салымшылары мен алушылары үшін ақпараттық арналарды дамытуға ерекше көңіл бөледі. 2021 жылдың 1 желтоқсанына кері байланыс арналары арқылы 1,4 миллионнан аса өтініш келіп түскен.
Естеріңізге сала кетейік, БЖЗҚ салымшылары мен алушылары 1418 нөмірі (Қазақстан бойынша қоңырау шалу тегін) арқылы байланыс орталығында, www.enpf.kz корпоративтік сайты, сондай-ақ +7 777 000 14 18 нөмірі бойынша WhatsАpp және Viber чат-боты және Facebook, Instagram, ВКонтакте, Twitter, Telegram, Одноклассники әлеуметтік желілеріндегі БЖЗҚ-ның ресми парақшаларында ақыл-кеңес ала алады.
