Нұр-Сұлтан, BAQ.KZ. Нұр-Сұлтан қаласының мамандандырылған ХҚКО қызметіне мониторинг жүргізілді.
Мониторинг азаматтардың әлеуметтік желілердегі кезекті онлайн брондау салдарынан туындаған қиыншылықтарға және кезек талондарын сатудан ақша тапқан делдалдардың іс-әрекеттеріне шағымдануына орай басталған.
Осындай қиындықтар карантин жағдайында мемлекеттік қызмет көрсетуге тек қана egov.kz сайты және Telegram-бот арқылы алдын ала жазылу жолымен қол жеткізу нәтижесінде туындаған.
Мониторингке қатысушылардың пікірінше, аталмыш мәселе онлайн брондау жүйесінің толық жетілмегендігіне байланысты. Бұл жағдайды жосықсыз пайда көздеушілер пайдаланып, бірнеше кезекті бірден брондау арқылы мемлекеттік қызметке зәру азаматтарға сату үстінде.
Сыбайлас жемқорлыққа қарсы іс-қимыл агенттігі төрағасының бірінші орынбасары Олжас Бектеновтің айтуынша, қалыптасқан жағдай "тұрмыстық" жемқорлық алғышарттарының қалыптасуына әкеліп соғып, қоғаммен теріс қабылданады. Осыған орай жауапты органдар қысқа мерзімде мәселені шешу үшін тиісті алгоритм әзірлеуі қажет.
Мониторинг қорытындылары бойынша мамандандырылған ХҚКО-да кезекті брондау рәсімін оңтайландыру іс-шаралары ұсынылды. Осылайша, жауапты мемлекеттік құрылымдар басшыларының сенімді растауы бойынша келесі аптадан бастап кезекті брондау кезінде өтінім беруші өз ЖСН көрсетуі тиіс, - деді ол.
Сондай-ақ, автокөлікті тіркеу үшін мамандандырылған ХҚКО-ға жүгінген кезде оларды жүйеде белгіленген уақытта бір қызметті алу үшін бекіту мақсатында сатушының немесе көлік иесінің (егер көлік сенімхат бойынша сатылса) және сатып алушының ЖСН көрсету қажет болады.
Осылайша, делдалдар кезек алу және кейіннен оларды сату мүмкіндігінен айрылады.
Жауапты мемлекеттік органдарға азаматтардың қызметті делдалдар көмегіне жүгінбей және олардың заңсыз көмектеріне ақша төлемей онлайн нысанда алу мүмкіндігі туралы түсіндіру жұмыстарын жандандыру қажеттілігі ескертілген.
