Нұр-Сұлтан, BAQ.KZ. Бішкекте Қырғызстанның жаңа премьер-министрі Садыр Жапаров пен экс-президент Алмазбек Атамбаев, экс-премьер Омурбек Бабановтың жақтастары арасында қақтығыс болды.
РИА Новости ақпаратына сүйенсек, Бішкектің ескі алаңынан Ала-Тоо алаңына келген Жапаровтың бір топ жақтастары мінберде сөйлеп тұрған Атамбаевтың жақтастарына шабуыл жасаған. Олар тас пен бөтелке лақтырған. Сондай-ақ, мылтық дауысына ұқсас дыбыстар естілген.
Еске салайық, 4 қазан күні Қырғызстанда Жогорку Кенешке депутаттарды сайлау өтті. Депутаттық мандатқа 16 партия үміткерлік еткен еді.
7 пайыздық межеден өткен төрт партия Қырғызстанның 120 орындық парламенті – Жогорку кенешке депутат жіберу мүмкіндігіне ие болған.
Сайлау нәтижелерімен келіспеген демонстранттар Бішкекте Қырғызстан парламенті – Жогорку кенеш ғимараты мен Президент әкімшілігі қоршауынан секіріп кірмекке талпынды. Демонстранттар ғимарат ауласына бөтелке, тас лақтырды. Митингіге шыққандар мен қарулы күштердің текетіресі Ақ үйге басып кірумен аяқталған.
Бұдан бұрын Бішкекте митингіге шыққандар басып кірген Ақ үйдің өртеніп жатқандығын хабарлағанбыз. Кейіннен Қырғызстанның астанасында митингіге шыққандар экс-президент Алмазбек Атамбаевты Ұлттық қауіпсіздік мемлекеттік комитетінің тергеу изоляторынан босатты.
Сонымен қатар, бүгін Бішкекте төтенше жағдай режимі енгізілгені белгілі болды.
