Нұр-Cұлтан, BAQ.KZ. Шахматтан Әлем чемпионы Бибісара Асаубаева Facebook-тегі парақшасында бюджеттен ақша ұрлау адамгершілікке жатпайтынын айтты.
Құрметті достар. Мен олимпиадаға дайындалу процесіне кедергі келтіретін спортқа қатысы жоқ шу шығарғым келмеді. Қосарым, мен гроссмейстермін, ақыл-ойы мен есте сақтау қабілеті мықты ересек спортшымын. Мен ешқашан ештеңені шатастырмаймын, ойлап таппаймын. Спорт министрі мырза болжағандай, эмоция үстінде ешқандай қадам жасамаймын. Мен Қазақстан мен Өзбекстанды шатастырмаймын, олардың федерацияларын шатастырмаймын. Сондай-ақ маған доллар АҚШ-тың валютасы екені белгілі. Оның үстіне мұны Қазақстанның жүрегі Ақордада жасамаймын. Біздің мемлекеттің президентінен шын-өтірігі қосылып сұрап алу жоспарланған үш миллиард теңге (немесе Хұсайынов мырза сіз айтқандай, 3 миллион доллар) өте үлкен сома және оған Федерация (оның ішінде біз, яғни құрама) лайық емес. Әсіресе Олимпиадаға бір ай уақыт қалғанда, - делінген жазбада.
Шахматшы өз жазбасында шындық үшін қудалаудан қорықпайтынын айтып, өтірік детекторынан өтуге дайын екенін мәлімдеді.
Мен жеке пайда мен бос атақ іздемейтін толыққанды спортшымын. Шахмат маған уақытты, өзімді және басқаларды бағалауды үйретті - уақыттан маңызды ештеңе жоқ. Қылмыстық зиянды әрі бос өтініштермен ел Президентінің уақытын алғым келмейді, ал ұлттық бюджеттен ақша ұрлап алғыңыз келсе, бұл дұрыс емес, этика мен адамгершілікке жатпайды. Ешкім мені керіге сендіре алмайды.
Сондықтан, ел Президентімен алдағы кездесу қарсаңында шындық үшін қудаланудан қорықпай, БАҚ өкілдеріне тікелей, ашық айттым. Егер «қорланған» адамдар өздерін қорлады деп есептесе, сотта атыңызды, құқығыңызды қорғаңыз.
Өтірік тақырыбына оралсақ. Мен жаттығу арасында уақыт тауып, полиграфта сынақтан өтуге дайынмын. Уақыт пен орынды менімен бірге өтірік детекторынан өтетін мырзалар Хұсайынов пен Сәдуақасов белгілесін. Үш адамның ақысын да өзім төлеуге дайынмын, оны менен сұраудың қажеті болмайды.
Енді Олимпиадаға дайындықты жалғастыруға рұқсат етіңіздер, - деді ол.
Еске сала кетейік, Бибісара Асаубаева «отандық шахматтағы былық» туралы осыған дейін де айтқан еді.
