Астанада мектеп оқушысы 5 жасар баланы құтқарғаны үшін марапатталды, деп хабарлайды BAQ.KZ.
Астана қаласы ТЖД баспасөз қызметінің мәліметінше, 23 мамырда Астанада ҚР Төтенше жағдайлар министрі Шыңғыс Әріновтың бұйрығына сәйкес адам құтқару кезінде батылдық пен өжеттілік танытқаны үшін №31 мектеп-гимназиясының 7-сынып оқушысы Ақан Әкімжанов марапатталды.
Мектеп жиналысында Астана қаласы ТЖД бастығы Марат Күлдіков Ақан Әкімжановты және оның ата-анасын ҚР ТЖ министрінің алғыс хаттарымен марапаттап, бағалы сыйлықтарды ұсынды.
Ақанның көрсеткен ерлігінің арқасында адам өмірі құтқарылды. Әр бала, әр азамат батылдық пен батырлық таныта отырып, қиын сәтте көмекке келе алатын болса, онда ол нағыз – құтқарушы. Осындай баланы тәрбиелеген ата-анасы мен мектеп ұжымына алғыс білдіреміз, - деп атап өтті қалалық ТЖД бастығы Марат Күлдіков.
.jpeg)
Естеріңізге сала кетейік, ол 20 мамырда Астанадағы көп қабатты үйлердің ауласында жүріп, 4-қабаттағы балкон қоршауында ілініп тұрған балаға көмек көрсетті. Жедел 4-қабатқа көтеріліп 5 жасар баланы құтқарды.
