Құтқарушылар бес тәулік бойы жолда қалған жүк көлігінің жүргізушісіне көмек көрсетті, деп хабарлайды BAQ.KZ Төтенше жағдайлар министрлігіне сілтеме жасап.
Белгілі болғандай, құтқарушылар Жамбыл облысындағы қатты аяздың салдарынан Қордай асуында қалып қойған жүк көлігінің жүргізушісіне көмек көрсету операциясын сәтті аяқтады.
“Трэкол” арнайы техникасымен төрт құтқарушы оқиға орнына жетіп, ауыр жағдайда қалған жүргізушіні тапты. Ұзақ уақыт бойы аязда тұрғандықтан, көліктің жанармайы қатып қалған, ал жүргізуші бес тәулік бойы жолда болған, - делінген ведомство таратқан ақпаратта.
Құтқарушылар зардап шегушіге шұғыл көмек көрсетіп, оның денсаулық жағдайын тексеріп және көліктің жұмыс қабілетін қалпына келтіруге көмектесті.
Жүк көлігінің жүргізушісі ТЖМ құтқарушыларының кәсібилігі мен уақытылы көрсетілген көмегі үшін алғысын білдірді.
