Жетісу облысындағы «Көктал» полигонында «Бауырластық шыңы-2024» халықаралық оқу-жаттығуы өтеді, деп хабарлайды BAQ.KZ.
Бірлескен тактикалық-арнайы оқу-жаттығулары барысында Қазақстан мен Беларусь десантшылары таулы-шөлді жерлерде тапсырмаларды орындауы тиіс.
Брест десанттық-шабуылдау бригадасының десантшылары екі жақты тактикалық және арнайы жаттығуларға қатысу үшін келіп отыр. Екі елдің «көгілдір береттері» әскери әуеайлағында кездесті. Кеңес Одағының Батыры генерал-майор Иван Панфилов атындағы 37-ші десанттық-шабуылдау бригадасының әскери қызметшілері қонақтарды дәстүрлі бауырсақпен және қымызбен қарсы алды.
Оқу-жаттығуға қатысушылардың келуіне орай Талдықорған қаласының Мәдениет сарайында 37-ші десанттық-шабуылдау бригадасы шығармашылық ұжымының күшімен концерт қойылып, қазақ және беларусь тілдеріндегі әндер орындалды.
Бұл екі ел әскери қызметшілерінің алғашқы кездесуі емес. Биылғы жылы ғана екіжақты әскери ынтымақтастық шеңберінде қазақстандық десантшылар Витебск маңындағы «Лосвидо» оқу полигонында парашют спортынан Беларусь Республикасы Қарулы күштерінің чемпионатында «Ерлік пен шеберлік» төсбелгісін тағу құқығы үшін кәсіби сынақтарға және Беларусьтің неміс-фашист басқыншыларынан азат етілгеніне 80 жыл толуына орай Минскіде өткен әскери шеруге қатысып қайтқан болатын.
«Бауырластық шыңы» оқу-жаттығуы қазіргі заманғы қарулы қақтығыстардың тәжірибесін ескере отырып әзірленді. Оқу-жауынгерлік міндеттерді пысықтау барысында әскери қызметшілер бірлескен басқару жүйесіне және іс-қимылдарды тактикалық деңгейде өрістету тәжірибесіне ие болады. Бұл бөлімшелердің далалық дағдыларын арттыруға оң ықпал етеді, –деп атап өтті оқу-жаттығудың жетекшісі Қазақстан Қарулы күштері Десанттық-шабуылдау әскерлерінің қолбасшысы генерал-майор Алмаз Жұмакеев.
Ашылу салтанатынан кейін екі біріккен жасаққа бөлінген екі елдің десантшылары бірден жаттығу өткізілетін ауданға авткөлікпен 300 шақырымдық марш жасап, оқу-жауынгерлік міндеттерді орындауға кірісіп кетті.
