Елена Рыбакина ұлттық құрама сапында өнер көрсеткісі келетінін айтты, деп хабарлайды BAQ.KZ тілшісі.
Әлемнің 10-ракеткасы саналатын қазақстандық спортшы халықаралық жарыстарда ел намысын қорғаған кездегі әсерімен бөлісті. Ол 2020 жылғы Олимпиада ойындарындағы жартылай финалға дейін жеткенін еске алды.
Қазақстанда теннис аса танымал емес. Уимблдонда жеңіске жеткеннен кейін бұл жетістік туралы барлығы айтатынын білдім. Елге келгенде тенниспен айналысқысы келетін балалардың көбейгенін байқадым. Федерация маған қанша баланың тенниске қызығушылық танытқаны туралы статистиканы айтты. Бұл шынымен таңғаларлық жағдай болды. Қай жерде жүрсеңіз де, өзіңе деген үлкен қолдауды сезесің! Маусым барысында қазақтың туын көріп отырасың, бұл – ерекше сезім. Мен үшін алғашқы Олимпиада ойындарында әрбір матчта керемет қолдау болды. Мұндай қолдауды сезіну – шын мәнінде үлкен мәртебе, – деді Рыбакина.
Айта кетейік, 2020 жылғы Жазғы Олимпиада ойындары 2021 жылы Токиода өтті. Елена Рыбакина қола медаль үшін өткен кездесуде украиналық Элина Свитолинаға жол берді.
0
0
0
0
0
