Балаларымыздың әр күлкісі – үлкен жеңіс

Балаларымыздың әр күлкісі – үлкен жеңіс
891

Көкшетау, BAQ.KZ тілшісі. Көкшетауда ерекше қажеттіліктері бар балалардың қатысуымен бірегей сән көрсетілімі өтті. 

Балалар ата-аналарымен бірге подиумнан өтіп, арнайы репортаждық түсірілімге қатысты. Іс-шара Қазақстандағы балалар жылы аясында ұйымдастырылды.

Бірнеше сағат бойы ерекше балалар көпшіліктің назарында болды. Көрермендер оларға аяушылық немесе қорқынышпен емес, жағымды таңданыс, махаббатпен қарады. Балалардың аналары өз өмірлері және осындай отбасыларға қандай мамандар қажет екендігі, сапалы оңалту, жайлы, кедергісіз орта туралы айтып берді. 

Сән көрсетілімі – астаналық Сassiopa продюсерлік орталығы мен Көкшетаудағы «Махаббат» клубының ортақ идеясы. 

Шамамен бір ай бұрын Instagram-да ерекше қажеттіліктері бар балалар тәрбиелеп отырған отбасылар үшін арнайы жоба жарияланды. Жобаның басты мақсаты – бір сәт бүкіл әлемге-ерекше қажеттіліктері бар кішкентай қазақстандықтардың көзімен қарау. Олардың ата-аналарының қандай қиындықтармен бетпе-бет келетінін, ерекше балалардың арқасында жетістікке жеткендерді насихаттау.  Балалардың толыққанды өмір сүруге құқығы бар, - дейді продюсерлік орталықтың жетекшісі Гүлмира Бектұрғанова.

Махаббат Қасымова бастапқыдағы сән түсіру идеясы кейін дефиле сценарийіне айналғанын айтады.

Сән көрсетілімі-Қазақстанның ерекше балаларын насихаттау бойынша ауқымды жобаның бір бөлігі ғана. Сондай-ақ тақырыптық фотосессиялар, жас модельдерге арналған арт-түсірілімдер, ата-аналармен сұхбат бар. Болашақта мұның бәрі халықаралық басылымдармен ынтымақтастыққа әкелуі мүмкін. Продюсерлік орталық балалар модельдерін халықаралық кастингтерге, шоуларға, сұлулық конкурстарына ұсынады. Балаларымыздың әр күлкісі – үлкен жеңіс, - дейді Махаббат Қасымова.

Көрсетілімге Көкшетаудан 17 ерекше бала, олардың аналары, әжелері, педагогтары қатысты. Бұл – кешкі көйлектер, жазғы қалалық көрініс, демалыс киімдері, спорттық және ретро стиліндегі жиынтықтар. 

Дефиленің маңызды бөлігі модельдердің таныстырылымы болды. Тоғыз жасар Рауан Тұрсынбаев мамандандырылған мектеп-интернатта оқиды, логопедпен жұмыс істейді, бассейнде жүзеді. Анасы Гүлнәрдің көмегімен бала жүруді, геометриялық фигураларды ажыратуды, әріптер мен сандарды оқып үйренді.

Жеті жасар Мәди Жанбаев №1 облыстық арнайы түзету мектеп-интернатына, сондай-ақ «Дарын» орталығында дефектологқа барады. Ол қазір барлық тапсырмаларды мұқият орындайды, оқиды, жазады. Сурет салудан алғыс хат алған.

Ерасыл Мәуленовке сегіз айында церебральды сал ауруы диагнозы қойылды. Қазір ол он екіде. Бала №19 мектеп жанындағы түзету кабинетіне барады, анасымен дефектологқа, сондай-ақ ипподромға барады. Анасы Жібек Тәжібаева ең басты мәселе – оңалту емес, ерекше балаларға қоғамның қатынасы екенін айтады.

Мен ұлым үшін еш қысылмаймын. Керісінше, мен барлық жерде ерекше балам бар екенін көрсетуге тырысамын. Өзгелер мүгедек балаларға қорқынышпен қарамаса екен деп армандаймын. Олар диагнозына кінәлі емес, - дейді ол.

Қатысушылар арасында халықаралық жарыстардың жеңімпазы да бар. Мансұр Қасымов Көкшетаудағы №4 қарапайым мектептің 2 сыныбында оқиды. Баламен логопед және психологпен айналысады, сондай-ақ емдік дене шынықтыру курстарынан өтеді. Еңбекқор, талантты бала Киевте өткен «Байланыс нүктелері» халықаралық фестивалінде бірінші орынға ие болды.

Балалардың аналарының айтуынша, ерекше балалар қоғамда өздерін еркін сезінулері тиіс. Аналар мүгедек балаларға арналған оңалту орындарының тапшылығы мәселесін бірінші жыл көтеріп отырған жоқ. 

 Алена Федотова-бес жасар Доминиканың анасы. Шамамен алты айында нәрестеге аутизм диагнозы қойылған.

Мұндай орталықтарды ашып, оларды қолжетімді ету керек. Кәдімгі балабақшалар бізді қабылдамайды. Менің қызым тәулік бойы ауруханада, мен оны демалыс күндері ғана үйге аламын. Медициналық-әлеуметтік мекемелер мен оңалту орталықтарында құм терапиясы, АВА-терапия, акупунктура, гидронезиотерапия, кинезиотапинг, бобат-терапия, биоакустикалық түзету, ерекше балаларға арналған йога және басқалары қолжетімді болғанын қалаймын. Өкінішке орай, мұның бәрі бізде жоқ. Мұндай қызметтерді ішінара республикалық орталықтарда немесе жеке қалаларда, содан кейін үлкен қалаларда алуға болады. Бірақ бағасы арзан емес, – деп түсіндірді Алена Федотова.

Оның айтуынша, облыс орталығында дефектолог, логопед, психолог, эпилептолог, нейропсихолог мамандары жетіспейді. Мұның бәрі балаға ерте жастан диагноз қоюға мүмкіндік бермейді және емдеу мен оңалту сапасын төмендетеді.

Сән көрсетілімін ұйымдастырушылардың бірі Махаббат Қасымова бірнеше ай бұрын «Махаббат клубын» құрды. Бұл ерекше балалардың аналары тәжірибе, жетістіктерімен бөлісетін алаң. 

Ақмола облысында инклюзияны қолдау кабинеттері жақсы жұмыс істейді. Бірақ олардың саны үшеу ғана. Ал ерекше білім беру қажеттіліктері бар балалар көп. Және жыл санап артып келеді. Мұғалімдер мен тәрбиешілер мектептерде инклюзияны енгізу үшін оқытудан өтеді, оқу материалдары сатып алынады. Бірақ мұндай кабинеттер көп болса, ата-аналарда күйзеліс болмас еді, – дейді Махаббат Қасымова.

Қысқа да нұсқа. Жазылыңыз telegram - ға

Фото: дереккөз
Өзгелердің жаңалығы