Нұр-Сұлтан, BAQ.KZ. Қазақстанның сыртқы істер министрі Бейбіт Атамқұлов 3 қыркүйекте ҚР Президенті Қасым-Жомарт Тоқаевқа сенім грамоталарын тапсырған Черногорияның елшісі Рамиз Башич және Зимбабвенің елшісі Майк Сангоны қабылдады, деп хабарлады ҚР Сыртқы істер министрлігінің баспасөз қызметі.
Ведомствоның мәліметінше, Черногорияның елшісі екі ел арасында түрлі бағыттардағы жылы және достық қарым-қатынастарды, соның ішінде туризм саласындағы ынтымақтастықты дамыту үшін бар күшін салатынын жеткізді.
Тараптар шарт-құқықтық базаны кеңейту мақсатында келесі жылы саяси консультациялар өткізуге келісті.
Р. Башич «Үлкен Еуразия: Диалог. Сенім. Серіктестік» тақырыбындағы Еуразия елдері парламенттері төрағаларының IV кеңесіне (2019 жылғы 23-24 қыркүйек, Нұр-Сұлтан қ.) шақыру үшін алғысын білдіріп, Черногория Парламентінің Төрағасы Иван Брайовичтің қатысуын растады.
Зимбабве елшісімен кездесу барысында Зимбабвенің Президенті Эммерсон Мнангагваның биыл қаңтарда Нұр-Сұлтан қаласына алғашқы ресми сапарының қорытындысы талқыланды. Зимбабве президентінің сапары барысында қол жеткізілген уағдаластықтарды одан әрі іске асыру мақсатында екі ел арасындағы ынтымақтастықты одан әрі жандандыруға келісті, атап айтқанда сауда-экономикалық және инвестициялық ынтымақтастық сөз болды.
Сұхбат соңында сыртқы саяси ведомствоның басшысы жаңа елшілерге дипломатиялық миссияның сәтті болуына тілек білдіріп, олардың қызметі барысында мемлекеттер арасындағы достық қарым-қатынас дамудың жаңа деңгейіне шығады деген үмітін білдірді.
