Дәстүрлі турнир елімізде үшінші рет өткізіліп жатыр, деп хабарлайды BAQ.KZ тілшісі.
Wrestling Stars турнирі 2024 жылдың 29 қарашасында Астана қаласындағы Beeline Arena спорт кешенінде өтеді. Бұл дәстүрлі турнирде әлемдік деңгейдегі күрес жұлдыздары еркін және грек-рим күресінің үздік шеберлері сынға түседі. Турнирде балуандар еркін күрестің 8 салмақ дәрежесінде күреседі. Жарыстың негізгі мақсаты күрес спортын насихаттау және олимпиадалық спортты дамыту.
Ең алғаш бұл жоба 2021 жылы Ақтөбе қаласында басталды. Биыл үшінші рет өткізгелі жатырмыз. Жылына бір рет емес 2-3 рет өткіземіз деген жоспарымыз бар. Әлемдік, халықарылқ жобаға айналады деп сенемін. Турнирде ең негізгі басымдық 74 келіде салмақ дәрежесіне беріледі. Елімізден екі қазақстандық балуан күреседі, - Күрес федерациясының вице-президенті Дәурен Жабасов.
Биылғы турнирге қатысатын белгілі балуандар қатарында екі дүркін әлем чемпионы Франк Чамисо, Азия чемпионы Санжар Досжанов, сондай-ақ қола жүлдегерлер Азамат Дәулетбеков пен Хорлан Жақанша бар. Сондай-ақ, жарыста жастар арасындағы әлем чемпиондары Исхар Құрбаев пен Ұлықбек Жолдошбеков белдеседі. Жеңімпаздарға арнайы жүлде қоры бар.
