Астанада осы оқу жылында тағы 7 мектеп ашылады, деп хабарлайды BAQ.KZ елорда әкімдігінің ресми сайтына сілтеме жасап.
Астана қаласының әкімі Жеңіс Қасымбек Instagram парақшасында биылғы оқу жылында ашылатын мектептер жайлы айтты. Ол биыл ашылатын 7 мектептің қай мекенжайда орналасқанын атап өтті.
Инфрақұрылымдық және әлеуметтік нысандарды салу жұмысын жалғастырамыз. Мәселен, осы оқу жылында тағы 7 мектеп ашамыз. Аталған оқу орындарының құрылыс барысымен таныстым. Бұл мектептер Қарасай батыр мен Бұланты көшелерінің қиылысында, Тұран даңғылы мен №24 көшенің қиылысында орналасқан. Сол сияқты қолданыстағы мектептердің аумағына жаңа корпустар салынады: Кирпичный елді мекенінде, Тархан көшесі, 16, Таха Хусейн көшесі, 5/1, Қарқабат көшесі, 17, Қабанбай батыр даңғылы, 9,1 мекенжайларында. Осыған дейін – оқу жылының басында 4 мектеп ашылған болатын, - деді ол.
Жеңіс Қасымбек «Жайлы мектеп» жобасы аясында елордада 24 мектеп салынатынын айтты.
Сонымен қатар Мемлекет басшысының тапсырмасы бойынша елордада «Жайлы мектеп» ұлттық жобасын іске асыруға кірістік. Жоба аясында 2024-2025 жылдары 24 жайлы мектеп салынады. Олар 90 мыңға жуық оқушы орнын (2 ауысымды) ашуға мүмкіндік береді. Олардың 15-і Есіл мен Нұра аудандарында орналасады. Дәл қазір бұл аудандарда мектептерге деген аса қажеттілік бар, - деді әкім.
Айтуынша, 2027 жылға дейін 65 мектеп салу жоспарда бар.
2027 жылға дейін бас-аяғы 180 мыңға жуық оқушы орнына (2 ауысымда) арналған 65 мектеп салуды жоспарлап отырмыз. Бұл шаралар мектептерге шамадан тыс түсетін жүктеменің қазіргі қиындығын ғана емес, болашақта орын тапшылығы мәселесін толықтай шешеді. Оқу орындары қаланың барлық ауданын, оның ішінде елді мекендерді де қамтиды, – деп түйіндеді Қасымбек.
