Нұр-Сұлтан, BAQ.KZ. Елімізде валюта айырбастау қиындауы мүмкін. Енді қаржы нарығын реттеуші бір адамға 500 мың теңгеден астам ақшаны айырбастауға немесе сатуға рұқсат етпейді. Мұндай бастаманы Ұлттық банк көтеріп отыр, деп хабарлады KTK телеарнасы.
Оған қоса енді ақша айырбастау пункттері әр операцияны журналға тіркеп отырады. Яғни, келер жылдан бастап ақша айырбастаған адамның аты-жөні мен жеке куәлігінің нөмірі жазылады.
Ең басты жаңалық - валюта айырбастау пункттерінің жұмысын күндізгі 10:00-нан кешкі 19:00-не дейін шектеуді ұсынып отыр.
Бұл туралы «Қазақстан Республикасы қолма-қол шетел валютасымен айырбастау операцияларын ұйымдастыру қағидаларын бекіту туралы» қаулының жобасында жазылған. Ақша айырбастаған тұлғаларға қатысты ақпараттың қалай тіркелетіні 51-тармақта көрсетілген. Құжат 16 тамызға дейін қоғам талқысына түседі.
Экономистердің пікірінше, Ұлттық банктің бастамасы шикі және ел экономикасын тығырыққа тірейді.
«Аяқ астынан бір адам валюта айырбастағысы келсе, амалын табады. Бұл жерде валюта айырбастау пункттерінің жұмыс уақытын шектеу арқылы көлеңкелі бизнеске жол ашамыз. Себебі, ақшаны жасырын, қолма-қол сататындардың саудасы қызады. Оған қоса, валютаны бір алғанда, сауда 500 мың теңгеден аспауы керек деген де күлкілі. Сонда құны 1500 доллардан асатын жылжымайтын мүлікті сатқандар не істемек?», - деді Әлемдік экономика және халықаралық қатынастар институтының директоры Әкімжан Арупов.
