Мәжіліс депутаты Ринат Зайытов тұрғын үй мәселесі жайлы айтып, сапасын сынады, деп хабарлайды BAQ.KZ тілшісі.
Еліміздегі өзекті мәселелердің бірегейі ол тұрғын үй мәселесі екенін жақсы білесіздер. Ол бір жақты ғана емес, жан-жақты. Иә, проблема барлық аймақта бар. Бірақ Астананың жайы ерекше. Үлескерлердің өз баспанасынан айырылып қалуынан бастап, елордада апта сайын бой көтеретін тұрғын үй кешендерінің сын көтермес сапасына дейін. Жүгенсіз заңсыздықтар мен мыңдаған халықтың естілмей, естілсе де ескерілмей жатқан мұңы бар бұл жағдайды бір жақты қылмаса, іс насырға шабуы әбден мүмкін, - деді депутат.
Ол мынадай мысал айтты. "Азия плюс" тұрғын үй кешенінде тұрғындар, яғни қариялар, кішкене балалармен жүкті аналар, сондай-ақ мүгедектігі бар тұлғалар өз үйлеріне кіретін есігінің, не кіреберісінің болмауына байланысты, күнделікті паркинг арқылы кіруге мәжбүр. Соның салдарынан бір баланы көлік қағып, күні кеше ғана 16 наурызда екі жеткіншек арсыз педофилдің қолына түсе жаздаған фактілері анықталған.
Онымен бұл мәселе біткен жоқ, бұл үйді тұрғындарға сатар кезде "Бизнес" санатындағы үй деп сатып, бірер жыл өткен соң пайдалануға қабылдау кезінде “Эконом” санатына ауыстыра салулары да мүмкін екен. Сонымен қатар "Успешный дом" тұрғын үй кешенінің тұрғындары да алаяқтық іс әрекеттерге ұшырап отыр. Бұл көп өзекті мәселенің біразы ғана, айта берсек айлап тауыспайтындай - зар бұл. Мәселенің мән-жайын анықтамақ оймен бір емес бірнеше әрекет жасап көрдік. Халықты ойлап жатқан бірде-бір құзыретті орган көрмедік. Олар халықты ойлауға емес, халықпен ойнауға машыққандай көрінді өз басыма, - дейді Ринат Зайытов.
Ол биыл 20 наурызында Парламент қабырғасында өткізген дөңгелек үстел де осы сөзін растағанын айтады.
Тұрғындар алаяқтық фактісі бойынша арыз жазса да іс қозғалмаған. Халықтың пайдасына шешілген сот шешімі орындалмаған. Осындай да біздің заңдар қарапайым халықтың мүддесін қорғауға келгенде неге қауқарсыз бола қалады? Ал жауапты органдар кінәні бір-бірінен іздеп, әдеттерінше ақсерек-көксерек ойнап отыр. Аузы қисық болса да, бай баласы сөйлейтін, көзі қисық болса да, көкесі барлар көсем болатын әдеттен қашан арыламыз, - деп шағымданды мәжілісмен.
Зайытов осыған ұқсас сұрақтар бойынша депутаттық сауал жолдаған әріптестері Дәулет Тұрлыханов пен Дәулет Мұқаевқа Үкімет жауап берген.
Берген жауабында Премьер-министрдің бірінші орынбасары Скляр мырза "Үкіметтің бақылауында" деген сүйікті сұйық жауабынан аса алмаған. Қашқақтап қағаз шығындай бергенше іске көшіңіздер мырзалар! – деді ол.
Зайытов мынадай ұсыныстарын айтты:
- Астана қаласы әкімдігі және құрылыс саласындағы оларға қарасты басқармалар қызметкерлеріне кешенді тексеру жүргізуді;
- Сәулет және қала құрылысы саласындағы мемлекеттік бақылауды күшейтуді;
- Құжаттарға заңсыз қол қойып, лауазымын пайдаланып, заңды бұзған қызметекерлерге шара қолдануыңызды сұрайды.
