Ақмолалық полицейлерге 44 жаңа қызметтік автокөліктің кілті табысталды, деп хабарлайды BAQ.KZ Polisia.kz-ке сілтеме жасап.
27 желтоқсанда Ақмола облысының әкімі Марат Ахметжанов полиция департаментінің қызметкерлеріне жаңа автокөліктердің кілттерін табыс етті. Жергілікті атқарушы органдардың көмегімен полицейлердің автопаркі 44 қызметтік автокөлікке ұлғайды. Салтанатты тапсыру рәсімі Көкшетау қаласының бас алаңында өтті.
Полиция қызметкерлеріне арнаған сөзінде өңір басшысы жаңа автокөлік полицейлерге адам орталығына бағдарланған қолжетімді полиция қағидаттарына сәйкес келуге мүмкіндік беретінін, ал басты міндет қоғамдық қауіпсіздікті қамтамасыз ету және азаматтың конституциялық құқықтарын сақтау болып қала беретінін атап өтті.
Сіздер алдарыңызға қойылған міндеттерді дұрыс орындайтындарыңызға сенімдімін, – деді Марат Ахметжанов.
Сондай-ақ өңір басшысы жаңа жылдық мерекелер мен демалыс күндері қарсаңында полицейлер ең жауапты миссиялардың бірін орындайтынын – жұмысшылардың қауіпсіз демалысын қамтамасыз ететінін және күшейтілген режимде қызмет атқаратынын атап өтті.
Салтанатты жағдайда жаңа автокөліктердің кілттері облыстық патрульдік полиция батальоны мен департаменттің арнайы бөлімшелерінің командирлеріне, сондай-ақ әкімшілік полиция басқармасы мен Кинологиялық қызмет орталығының басшыларына табысталды.
Полицейлердің айтуынша, алдағы күндері Chevrolet Cobalt маркалы 25 жаңа патрульдік автокөлік облыстық және республикалық трассаларды алғашқы патрульдеуге шығады. Осы маркадағы тағы 7 автокөлік стандартты түрде жедел-іздестіру іс-шараларын жүргізу үшін ведомствоның жедел қызметтеріне берілді.
Сонымен қатар автопарк белгіленген стандарттарға толық жауап беретін, қажетті техникалық құралдармен жабдықталған және Ақмола құқық қорғау органдарына қоғамдық тәртіпті бұзушылықтарға жедел ден қоюға мүмкіндік беретін Jac маркалы 5 көлікпен толықтырды. Полицейлердің арсеналында жаңа эвакуатор мен қызметтік иттерді тасымалдауға арналған көлік және арнайы бөлімшелерге арналған көлік бар.
Цифрландыруды дамыту шеңберінде патрульдік полиция қызметкерлеріне құқық бұзушылықтарды автоматты түрде тіркеуге мүмкіндік беретін “Автоураган” бағдарламалық кешені орнатылған KiA маркалы екі автокөліктің кілттері табысталды. Тапсыру рәсімінен кейін облыс әкімі Марат Ахметжанов пен полиция департаментінің бастығы Нұрсұлтан Мұқашев жаңа автокөлікті қарап, техникалық сипаттамалармен танысты. Іс-шара соңында өңір басшысы департаменттің жеке құрамына тағы да жүгінді.
Кез келген құқық бұзушылық жазалануы тиіс, ал азаматтарды заңдылықты сақтауға тәрбиелеу қажет. Көкшетау мен Ақмола облысы еліміздің ең қауіпсіз өңірлерінің біріне айналуы тиіс, бірақ бұл үшін полицейлер өз қызметін адал атқаруы керек, – деді Марат Ахметжанов.
