Жаңа оқу жылында облыс әкімінің гранты бойынша жүз мұғалім Ақмола облысының мектептерінде жұмысқа кіріседі, деп хабарлайды Ақмола облысындағы BAQ.KZ тілшісі.
Ақмола облысы әкімінің орынбасары Елдос Рамазановтың мәлімдеуінше, облыс бойынша білікті педагог кадрлардың тапшылығы мәселесін шешу, әсіресе мұғалімдерді ауылдық жерлерде тұрақтандыру әдістері іздестірілуде. Мәселен, өңірде облыстық бюджет қаражаты есебінен жоғары педагогикалық білім алу үшін мемлекеттік білім беру гранттарын бөлу тәжірибесі жалғасуда.
Қазіргі уақытта облыс әкімінің гранты бойынша 400 адам білім алуда. 2022 жылы бітірушілер саны 100 маманды құрады. Олардың барлығына облыс мектептеріне жолдама берілді. Сонымен қатар, жазда білім беру ұйымдарына 180 педагог келді, - дейді облыс әкімінің орынбасары Елдос Рамазанов.
Бүгінгі таңда өңірдегі білім беру ұйымдарында-мектептерде, балабақшаларда, колледждерде және арнайы педагогикалық мекемелерде 22 мыңнан астам мұғалім жұмыс істейді.
Жалпы білім беретін мектептердегі педагогтарға қажеттілік 259 маманды құрайды. Атап айтқанда, математика – 52, орыс тілі мен әдебиеті – 47, ағылшын тілі – 38, бастауыш сыныптар – 27, физика – 17, информатика – 13, география – он, химия – тоғыз, биология – жеті және басқа пәндер — 39, – деп нақтылады Елдос Рамазанов.
Ол атап өткендей, егер қарсы көрсетілімдер болмаса, мұғалімдер коронавирусқа қарсы вакцинациядан өтеді.
Жаңа оқу жылының алдында ұжымдық иммунитетті қалыптастыру үшін білім беру ұйымдарының педагогтері мен техникалық персоналына вакцинация жүргізіледі. Облыстың білім беру ұйымдарының 22 739 педагогінің 21 754-і вакцинацияланды, 985-і медициналық іріктеуден өтт. Бүгінгі күні 16 920 педагог қайта вакцинацияланды (78 пайыз). 14 048 қызметкердің 702-інің медициналық қарсы көрсеткіштері бар, 13 433-і екі компонентпен егілді, 10 544-і (77 пайызы) ревакцинацияланды, – деп нақтылады облыс әкімінің орынбасары.
Оқулықтармен қамтамасыз ету мәселесіне келсек, жаңа оқу жылында екінші сыныпқа арналған қайта басылған оқулықтар, үштілділік және инклюзивті білім беру бойынша, бірінші, үшінші, 11-сыныптар үшін қажетті оқулықтар алдын ала сатып алынады.
Оқушы санының артуына байланысты және «Оқуға құштар мектеп» жобасы аясында көркем әдебиет сатып алу жоспарлануда. Бұл мақсатқа бюджет қаражатынан 1,1 миллиард теңге бөлінді. Бүгінгі таңда 19 баспамен 233 келісім-шарт жасалды. Оқу әдебиетін тасымалдаушылар анықталды, - деп түйіндеді Елдос Рамазанов.
Естеріңізге сала кетейік, жаңа оқу жылында Ақмола облысының 546 мектебіне 136 мыңнан астам оқушы, оның ішінде 14 879 бірінші сынып оқушысы келеді. 26 мамырдан 17 маусымға дейін ата-аналардың өтініші бойынша балаларға арналған 530 орта білім беру ұйымдарында жазғы мектеп жұмыс істеді. Оған 37,6 мыңнан астам оқушы қатысты.
