Талдықорған тұрғындары үйдің қасбетіне еліміздің туын ілді

Алматы, BAQ.KZ. Тәуелсіздік мейрамына орай Алматы облысы да «Менің туым. Менің Отаным!» атты республикалық челленджді қолдап,  Талдықорған қаласындағы көпқабатты тұрғын үйдің қасбетіне Қазақстанның туын орналастырды. 

Шектеу шаралары мен мәдени-көпшілік іс-шараларды өткізуге тыйым салынғанына қарамастан, жетісулықтар осы айтулы күннің - Қазақстан Тәуелсіздігінің 30 жылдығының маңыздылығын ерекше атап өтуге бел буды.  

Үй тұрғындарының айтуынша, бұл челлендж азаматтардың, әсіресе өскелең ұрпақтың патриоттық сезімдерін күшейтуге ықпал ете алады. 

Елбасы Нұрсұлтан Әбішұлы айтқандай, мемлекеттік рәміздер - бұл біздің мемлекетіміздің, біздің егемендігіміздің берік негізінің бірі. Олар Тәуелсіздіктің қасиетті бейнесін білдіреді. Эпидемиологиялық жағдайға қарамастан, біз бұл күннің маңыздылығын ұмытпауымыз керек, - дейді 16 қабатты тұрғын үйде тұратын Гүлназ Ермұратова. 

Сонымен қатар қала тұрғындары да күнтізбедегі ең маңызды күнді мерекелеу үшін жүзеге асырылған шығармашылық істі  бағалады.  

Мен осы ықшам  ауданның тұрғынымен. Мойын созып қарағанда көк туымыз көзіме оттай басылды. Өте әдемі көрінеді. Біз әрқашан Тәуелсіздік күні мен мемлекеттік рәміздерге ерекше мән беруге тиіспіз деп санаймын. Ал мұндай челлендждер Тәуелсіздіктің қастерлі үғым екенін түсінуге көмектеседі, - дейді қала тұрғыны Аяужан Болат. 

Естеріңізге сала кетейік, Тәуелсіздіктің 30 жылдығын мерекелеу аясында «Менің туым. Менің Отаным!» челленджі бүкіл республика бойынша басталды. Әлеуметтік маңызы бар нысандарда және тұрғын үйлердің балкондарында мемлекеттік рәмізді ілуге рұқсат етіледі. Бұл акцияны қазақстандықтар оң қабылдады. Олар әлеуметтік желілерде арнайы жобалармен, фото және бейнематериалдармен бөлісіп жатыр.