Қазақстандық хоккейшілер екінші мәрте жеңіске жетті

2023 жылғы қысқы Универсиадада шайбалы хоккейден Қазақстан студенттер құрамасы екінші ойынын Венгрияға қарсы өткізді, деп хабарлайды BAQ.KZ  turkystan.kz сілтеме жасап.

Кездесу барысында қазақстандық хоккейшілер сәтті ойын көрсетті. Бірінші кезеңде қарсылас қақпасына бес гол соғып үлгерді. Оны Артем Королёв – 2, Абай Маңғысбаев – 4, 16, Максим Мусоров – 7, Всеволод Логвин 12-минуттарда өзінің еншісіне жазды.

Екінші кезеңде қазақстандық хоккейшілер қарсылас қақпасына тағы үш шайба соқты. Құрама сапынан Станислав Александров – 25, Саян Данияр 29-минутта мергендік танытса, Максим Мусоров 34-минутта тағы бір мәрте көздеген нысанадан мүлт кеткен жоқ.

Ал үшінші кезеңде Саян Данияр 49-минутта гол соғып, басымдықты арттыра түссе, 54-минутта венгриялық спортшылар кездесу барысындағы алғашқы голын соқты.

Осылайша Қазақстан студенттер құрамасы қарсыласынан 9:1 есебімен басым түсті.