Өскеменде алкоголь өнімдерін қолдан жасағандар қолға түсті

Нұр-Сұлтан, BAQ.KZ. Құрамында спирті бар өнім Өскемен қаласындағы өндірістік базалардың бірінде ұйымдастырылған. Бұл туралы ақпаратты Қаржылық мониторинг агенттігі таратты.

Цехтың қызметкерлері суррогатты алкогольді антисанитарлық жағдайда спиртке су, түрлі бояулар мен дәмдеуіштер қосу арқылы жасап отырған. Бөтелкелерге жалған акциздік маркалар мен түрлі отандық арақ-шарап шығаратын зауыттардың этикеткалары жапсырылған, - деп мәлімдеді ҚР ҚМА баспасөз қызметі.

Ведомство екі цехтың ішіне тінту жүргізу барысында 16 мыңнан астам өткізуге дайын тұрған қолдан жасалған алкоголь өнімдері, 715 литр спирт, 15 мыңнан аса жалған акциздік маркалар алынғанын хабарлады.

Қазіргі уақытта заңсыз әрекетке қатысы бар тұлғаларды анықтауға бағытталған жедел тергеу шаралары жүргізіліп жатыр, - деді ҚР ҚМА баспасөз қызметі.