Латын әліпбиіне негізделген қазақ тілін оқыту кабинеті ашылды
Қостанай облысы, BAQ.KZ тілшісі. «Тілдарын» облыстық тілдерді оқыту орталығында қазақ тілін латын графикасына негізделген әліпбимен үйрететін кабинет ашылды. Салтанатты іс-шараға өңірдегі зиялы қауым, этно-мәдени орталықтар мен үкіметтік емес ұйымдардың өкілдері қатысты.
Қостанай облысы әкімдігінің тілдерді дамыту басқармасы басшысы Гүлжан Меңдекинова құттықтау сөз сөйлеп, «Рухани жаңғыру» аясында өңірде жасалып жатқан жұмыстарға тоқталып өтті.
«Елбасы Нұрсұлтан Назарбаевтың «Болашаққа бағдар: рухани жаңғыру» бағдарламалық мақаласына екі жыл толды. Біздің облыста бұл бағыттағы жұмыстар жүйелі жүзеге асырылуда. Жалпы, екі жылдың ішінде алты мыңнан астам іс-шара өткізіліп, ақпараттық-түсіндірме жұмыстары 500 мыңға жуық адамды қамтыды. 2018 жылы жоба бойынша жұмыстарды жүргізуге 19 млн теңге қаражат бөлінді. Соның ішінде жаңа қазақ әліпбиін әзірлеуші ұлттық комиссия мүшелерімен кездесулер, республикалық ғылыми-практикалық конференция, жалпыхалықтық диктант, семинарлар, ашық сабақтар, акциялар, тағы басқа іс-шаралар өткізілді», - деді Гүлжан Меңдекинова.
Латын графикасына негізделген қазақ тілінің емле-ережелерін облыс жұртшылығына түсіндіру үшін биыл облыс бюджетінен 22 млн теңге қаралып отыр. Ал «Тілдарын» орталығының материалдық-техникалық базасын нығайтуға 7 млн теңге бөлінген болатын. Жаңа кабинетті жабдықтауға осы қаражаттың 4,5 млн теңгесі жұмсалды. Соңғы үлгідегі құрылғылармен жабдықталған кабинетте енді қысқа мерзімді 24 сағаттық, 36 сағаттық курстар ұйымдастырылады.
ҚР Мәдениет және спорт министрлігі Тіл саясаты комитетінің «Тіл-Қазына» ұлттық ғылыми орталығының ғалым-хатшысы Гүлфар Мамырбек жаңа кабинеттің ашылуын тарихи сәт деп бағалады.
«Бұл тілдік реформаның басты мақсаты – қазақ тілінің ұлттық әуез бен ерекшеліктерін сақтай отырып, әрі қарай дамуын жалғастыру. Бұл – бір. Екіншіден, әлемдік қауымдастықта латын графикасының әлеуеті өте жоғары. Дүние жүзінде 70% жуық халық осы графиканы пайдаланады екен. Үшіншіден, түркілік бірегейлік деген үлкен ұғым бар. Туыстас елдермен тарихи сабақтастық ешқашан жойылмаған және жойылмайды да. Осы латын әліпбиінің негізінде оның тамырластығы әрі қарай тереңдей береді», - деді Гүлфар Мамырбек.
Салтанатты шараның ресми бөлігінен соң, жұртшылыққа орталықтың tildaryn.kz сайтында жасақталған «Оңай оқы, оңай жаз» атты жаңа әліпбиді меңгеруге арналған онлайн-оқыту платформасы таныстырылды. Жаңадан іске қосылған онлайн-оқыту құралының әліппе, әдістер, конвертер, тапсырмалар, тестілеу сияқты бөлімдері бар. Орталықтың интернет ресурсына кірген кез келген адам оны ашып, үйрене алады.
«Тілдарын» орталығы мемлекеттік, ағылшын тілдерін ғана емес, этникалық топ өкілдеріне өз ана тілдерін үйретуді де ұйымдастырып келеді. Атап айтқанда, армян, корей, украин, башқұрт, татар, поляк, неміс тілдері оқытылады. Бүгінде орталықта 985 тыңдаушы оқып жүр.