Ақтөбеде заңсыз онлайн-казино ойынын ұйымдастырған қылмыстық топ ұсталды
ҚМА Ақтөбе облысы бойынша департаменті прокуратураның үйлестіруімен заңсыз онлайн-казино ойынын ұйымдастырған қылмыстық топтың қызметін тоқтатты, деп хабарлайды BAQ.KZ.
Сонымен, күдіктілер 2022 - 2024 жылдар аралығында ұйымдасқан қылмыстық топ құрып, "bingo37.pro" платформасы арқылы заңсыз ойын бизнесін басқарған.
Қатысушылардан ақшалай бәсті операторлар банктік аударым арқылы қабылдаған, содан кейін оларды платформаға тіркеп, ойынға қатысу үшін логин, пароль және сілтеме ұсынған.
Қылмыстық табысты заңдастыру мақсатында күдіктілер дроптарды — көлденең адамдарды тартып, олардың атына банк карталарын рәсімдеген. Ақшаның қылмыстық ізін жасыру мақсатында осы карталар арқылы олар қомақты ақша сомаларын қолма-қол ақшаға айналдырып отырған. Заңсыз онлайн-казиноның қызметінен күн сайын 150 000 теңгеден 200 000 теңгеге дейін ақша түсіп отырған, - делінген ҚМА хабарламасында.
Топтың жалпы қылмыстық табысы 306 миллион теңгеден асқан.
Қаржылық тергеу барысында күдіктілер заңсыз алынған ақшаға жалпы құны 66 миллион теңгені құрайтын "Toyota Land Cruiser" және "Lexus EC 250" маркалы екі автокөлік алғаны анықталды.
Осы көліктерді тәркілеу мүмкіндігінен жасыру мақсатында сенімді адамдардың атына рәсімдеген.
Соттың санкциясымен аталған автокөліктерге тыйым салынды.
Ұйымдастырушыларға қатысты сот күзетпен ұстау түріндегі бұлтартпау шарасын таңдады.
Сотқа дейінгі тергеу жалғасуда.
ҚР ҚПК 201-бабы бойынша тергеу мүддесі үшін басқа ақпараттың таратылуына тыйым салынған.
Қаржылық мониторинг агенттігі банктік карталар мен шоттарды пайдалану арқылы заңсыз схемаларға қатысқаны үшін жауапкершілікке тартылу қаупі бар екенін ескертеді.
Күмәнді қаржылық операцияларға қатысудан сақ болуға шақырамыз. Егер сізге қаражат аударғаныңыз үшін жеңіл табыс ұсынса, бұл қылмыстық схеманың бөлігі болуы мүмкін. Мұндай жағдайларда барлық байланыстарды тоқтатып, құқық қорғау органдарына хабарлауыңыз қажет, - деп ескертті агенттік.