80 млрд теңге қаражат үнемделді – ҚМА

Мемлекет басшысының мемлекеттік бюджетті тиімді пайдалану тапсырамасы аясында, Қаржылық мониторинг агенттігі инфрақұрылымдық және әлеуметтік жобаларды іске асыру барысында артық шығындар тәуекелдерін азайту жөніндегі жұмысты жүргізуде, деп хабарлайды BAQ.KZ.

Аталған жұмыс жергілікті атқарушы органдармен және квазимемлекеттік сектор өкілдерімен бірлесіп жүзеге асырылуда.

Осы жылдың қаңтар айынан бастап 34 жоба бойынша 79 млрд теңгеден астам сомаға бюджет қаражатының шығындары қысқартылды.

Мәселен, Қарағанды облысында «Қарағанды Су» ЖШС Негізгі су тазарту құрылыстарының блоктарын қайта жаңарту» жобасының ЖСҚ әзірлеу сатысында құбырлардың 5 түрінің құны артық жобаланғаны анықталды.

Бірлескен жұмыс қорытындысы бойынша жобаның мәлімделген сметалық құны 23 млрд теңгеден 16,8 млрд теңгеге дейін төмендетілді, нәтижесінде 6,1 млрд теңге үнемделді. 

Сол секілді, «Жайлы мектеп» ұлттық жобасын талдау барысында өндіруші немесе олардың дистрибьюторлары болып табылмайтын жеткізушілердің ұсыныстары негізінде интерактивті сенсорлық панельдің құнын арттыру фактісі анықталды. Агенттік «ҚазҚСҒЗИ» АҚ-мен өзара іс-қимыл нәтижесінде панельдердің бағасы нарықтық деңгейге дейін төмендетілді, бұл 14 млрд теңге мөлшерінде артық шығындардың алдын алуға мүмкіндік берді, - деп жазды ҚР ҚМА баспасөз қызметі.