1,8 млрд теңге: "АрселорМиттал Теміртау" мүлкін ұрлаған директор қамауға алынды

Қаржылық мониторинг агенттігі «АрселорМиттал Теміртау» АҚ мүлкін жымқыру фактісі бойынша «АлбаСтройДор» ЖШС директоры С.Г.Ким қамауға алынғанын мәлім етті, деп хабарлайды BAQ.KZ тілшісі. 

Қаржылық мониторинг агенттігі («Qarmet» құқықтық мирасқоры болып табылатын) «АрселорМитталТеміртау» АҚ мүлкін жымқыру фактісі бойынша «АлбаСтройДор» ЖШС-нің директоры С.Г.Кимге қатысты тергеу жүргізуде.

2015 жылы «АрселорМиттал Темиртау» АҚ мен «АлбаСтройДор» ЖШС арасында қайта өңдеу қалдықтарына билік ету құқығынсыз домна шлагын қайта өңдеу туралы шарт жасалған. Алайда С.Г.Ким өндірістік нысандарға еркін қолжетімділігін пайдалана отырып, зауыт аумағынан домна қоспасы мен кесек шойынды жымқыру схемасын ұйымдастырған.

Ұрланған мүлікті кедергісіз шығару мақсатында қылмыстық схемаға өзара байланысты күзет ұйымы — «Күзет» ЖШС тартылған, оның қызметкерлері автокөліктердің іс жүзінде бақылаусыз өтуін қамтамасыз еткен. Ұрланған мүлікті С.Н.Ким өз бақылауындағы «ГлобалСпецТорг» ЖШС және «ЦентрОптСнаб» ЖШС арқылы заңдастырған. Заңсыз әрекеттердің нәтижесінде жалпы сомасы 1,8 млрд теңгеден асатын 31 мың тоннадан астам өнім ұрланған. Күдікті Ким 2 ай мерзімге қамауға алынды, - деп хабарлады ҚМА ресми өкілі Ернар Тайжан.

Сотқа дейінгі тергеу жалғасуда.