Алматы, BAQ.KZ. Қала әкімі Бақытжан Сағынтаев жұмыс сапары барысында Әуезов ауданы тұрғындарының балабақшалар мен мектептерде орын тапшылығы, абаттандыру және жұмыс орындарымен қамтамасыз ету жөніндегі өтініштерін шешу жолдарымен танысты.
Әуезов ауданының тұрғындары көтерген ең өзекті мәселенің бірі – мектептердегі орын тапшылығы. Бүгінгі күні ауданда 5365 орын жетіспейді. 6 мыңға жуық адам тұратын "Мамыр" ықшам ауданында 1200 орынды мектеп салынуда. Б. Сағынтаев құрылыс алаңын аралап көрді және қолданылатын құрылыс материалдарының сапасын, құрылыс жұмыстарының барысын қатаң бақылауға алуды тапсырды. Жаңа оқу жылында салынып жатқан осы мектепті және "Ақсай-3а" ықшам ауданындағы №123 мектеп жанындағы 400 орынды қосалқы нысанды пайдалануға беру жоспарланған.
Бұлардан өзге, биыл бес мектеп жанынан жалпы сыйымдылығы 3550 орынды қосалқы нысандардың құрылыстары басталады. Олар - №6 мектеп іргесіне салынатын 900 орынды, №117 мектеп қасына салынатын 900 орынды, №133 мектеп жанынан бой көтеретін 400 орынды, №132 мектеп іргесіне салынатын 800 орынды және №121 мектеп қасынан салынатын 550 орынды нысандар. Осылайша, Әуезов ауданында мектептердегі орын тапшылығы іс жүзінде оң шешімін табатын болады.
Жалпы, қала бойынша мектептерде 30 мың орын жетіспейді. Халықтың саны өсуіне орай келер оқу жылында бұл көрсеткіш екі есеге артады. Сондықтан 2020-2021 жылдары 16 жаңа мектеп және 23 қосалқы нысан салу жоспарланған, бұларда шамамен 47,5 мың орын болады. Яғни, оқушы орнының тапшылығы 80 пайызға қысқарады. Құрылыс ЖҚЖК, МЖӘ бағдарламалары мен жобалары және бизнестің әлеуметтік жауапкершілігі бойынша әрі жеке кәсіпкерлікті ынталандыру арқасында қарқынды жүруде, - делінген хабарламада.
Балабақшалардағы орын тапшылығы мәселесін шешуге тұрғын үй кешендерін салумен айналысатын кәсіпкерлер көмектесуде. Алматы қаласы әкімінің тапсырмасы бойынша ТК салу кезінде әлеуметтік нысандар үшін орындар бөлу міндетті түрде қарастырылуы тиіс. Бұл білім берудің қалалық мекемелеріне түсетін жүктемені азайтуға септігін тигізеді. "Үш сұңқар" ТК "Ақсай-5" ықшам ауданында құрылыс салып жатқан компания 115 орынды балабақша үшін арнайы орын бөлді.
Ауданда 16 584 баланы қамтитын 46 мемлекеттік және 122 жеке балабақша бар. Мемлекеттік тапсырыс бойынша 63 жеке балабақша жұмыс істеп жатыр. 2019 жылы мемлекеттік (120 орынды) және 25 жеке балабақша (400 орынды) пайдалануға берілген болатын.
2020 жылы тоғыз жеке балабақшаны ашу жоспарланған, бүгінгі күні олардың 178 орынды үшеуі ашылды.
