Тәжікстан мен Өзбекстанның 30 азаматы көші-қон заңнамасын бұзғаны үшін елден шығарылды, деп хабарлайды BAQ.KZ.
Алматы қалалық Полиция департаментінің мәліметінше, «Учаске» жедел алдын алу іс-шарасы барысында еліміздің көші-қон заңнамасын бұзған 2 380 адам анықталды, олардың 813-і шетелдік азамат. Олар ҚР ӘҚБтК-нің 517-бабы бойынша әкімшілік жауапкершілікке тартылды.
Полиция департаментінің қабылдап-таратуына жеке басын куәландыратын құжаттары жоқ 387 шетел азаматы орналастырылды. Сонымен қатар шетелдіктердің Қазақстанда болуының заңдылығын қамтамасыз етпеген 349 азаматқа қатысты әкімшілік шара қолданылды, – деді Алматы қалалық ПД көші-қон қызметі басқармасының бастығы Асхат Бутунчинов.
Сондай-ақ ол Тәжікстан мен Өзбекстанның 30 азаматы елден шығарылғанын атап өтті.
