2013 жылдан бастап Қазақстанда қыркүйектің әр екінші жексенбісінде «Отбасы күні» атап өтіледі. Осы мерекенің құрметіне 3 қыркүйекте Алматыда қалалық «Almaty Gallery» галлереясында «Шежiре: қазақ отбасының құндылықтары мен дәстүрлері» атты көрме ашылды, деп хабарлайды BAQ.KZ тілшісі.
Көрмені қоғам қайраткері, әкелер одағының мүшесі, Art of Her медиа-порталының негізін қалаушы кәсіпкер Әлихан Мұсатаев Ақпарат және қоғамдық даму министрлігімен және Алматы қаласының әкімдігімен бірлесе ұйымдастырды.
Көрмеге Қазақстан суретшілер одағының, басқа да қауымдастықтардың мүшелері, кәсіби суретшілердің 60 жуық картинасы қойылды. Отыздан астам суретшінің ішінде атақты қылқалам шеберлері де, жас таланттар да бар. Олар: Өмірбек Жұбаниязов, Максим Ведерников, Азат Табиев, Евгений Фридлин, Лидия Дроздова, Салихитдин Айтбаев, Эдуард Казарян, Александр Садвакасов және т.б. Көрмеде қазақстандық суретшілердің балалық шақ, отбасы, махаббат және өзара қарым-қатынас тақырыптарын бейнелейтін картиналары ұсынылды. Картиналардың жанры, техникасы және стилі әртүрлі. Кескіндеме, графика, гобелен, мүсін де бар.
Елімізде қыркүйектің әрбір екінші жексенбісінде Отбасы күнін атап өтетінімізді көп адам біле бермейді. Барлық суретші шығармашылығында отбасы тақырыбын қозғауы сөзсіз, өйткені отбасы әр адам үшін құнды, жылы, жанға жылу сыйлайды, – дейді Қазақстан Суретшілер одағының төрағасы Өмірбек Жұбаниязов.
Суретшілер шығармаларында отбасы тақырыбын әртүрлі формада, бейнеде көрсеткен. Біреулер үшін бұл ата мен әже портреті, ауылдағы балалық шақтың эскиздері болса, енді бір суретші үшін – жылқы мен құлындар жайылған жайлау пейзаждары, үй тіршілігінің натюрморттары.
Мен ауыл балалары, апа, ата секілді өзім жақсы көретін адамдардың бейнесін сызуға құмармын. Қазақтың өрнектерін, әндерін, домбыра үнін жақсы көремін. Бұл менің әлемім, мен сонда, далада жарқыраған күннің астында өстім. Көрмеге акварельмен салынған 3 жұмысымды ұсындым, – дейді суретші Лидия Дроздова.
Өнертанушы Александра Кудряшова болса өнердегі отбасы бейнесі біржақты болуы мүмкін емес екенін айтады.
Қазір бізге отбасы бейнесін жаңғырту қажет, өйткені бізде ұлттық консервативтік түсінік бар. Қазіргі заманғы түсінік те ұлттық. Бұл көрме алға жасалған жақсы қадам. Ол дәстүрлі шеберлерді ғана емес, қазіргі жас суретшілердің де басын біріктіреді. 6-10 жылдан кейін отбасының бұл бейнесі қалай өзгеретіні қызық, - деді Александра Кудряшова.
Art of Her медиа-порталының негізін қалаушы Әлихан Мұсатаев көрмені ұйымдастыру идеясы жас отбасылардың 1-ші республикалық форумын ұйымдастыра бастағанда келгенін атап өтті.
Көрермендер бұл көрме залы арқылы отбасы тақырыбының қаншалықты маңызды екенін және отбасының бала таңдауына, жалпы оның болашақ дамуына қалай әсер ететінін түсіне алады. «Шежіре» көрмесі ең бастысы отбасындағы бақыт екенін көрсетеді. Бұл тақырыпты көбі насихаттамайды. Түрлі тақырыптағы осындай көрмелер мүмкіндігінше жиі ұйымдастырылып отырса деймін. Классикалық түсініктен тыс отбасы туралы интерпретация жазатын заманауи жас суретшілерді жинағым келеді, – дейді Art of Her негізін қалаушы Әлихан Мұсатаев.
Көрмеге қатысушылар үшін өнертанушы, өнертану профессоры, Art Society спикері Ольга Батурина «Onermen Kezdesy»: Қазақстан және әлемдік бейнелеу өнеріндегі отбасы және махаббат бейнесі» атты арнайы дәріс өткізді. Дәрісте көрермендер Ежелгі Египет, Ренессанс, барокко, қазіргі заман, махаббат, отбасы және балалық шақ тақырыптары бейнеленген ХХ ғасыр кескіндемесінің әлемдік бейнелеу өнерінің жауһарларын тамашалады. Дәрістің басты мақсаты – көрермендер мен тыңдаушыларды отандық өнер шеберлерінің осы тақырыптағы үздік туындыларымен таныстыру.
Қазақстанның кескіндеме өнері бірегей және алуан түрлі. Отбасындағы махаббат туралы сюжеттер суретшілеріміздің сүйікті тақырыптарының бірі. Бұл жайдан-жай емес. Дәстүрлі қазақ мәдениеті отбасы құндылығы мен оның маңыздылығын адам өміріндегі ең басты қазына ретінде түсінуге негізделген. Біз көрерменмен Айша Ғалымбаева, Гүлфайрус Исмаилова, Молдахмет Кенбаев, Марат Бекеев, Домбровский Қасымов, Тұрсын Әбуов, Тоқболат Тоғызбаев, Елена Бейсембинова, Әлібай Бапанов, Ғанижамал Тагенова сынды қазақтың белгілі суретшілерінің туындыларын тамашаладық. Сондай-ақ, Әйгерім Кәрібаева секілді қазақстандық талантты жас суретшілермен таныстық, - деп түсіндірді Ольга Батурина.
Кешке ата-аналар мен 12 жастан асқан балалар үшін кино-коуч Айнұр Әбдіқұлованың қатысуымен режиссер Стивен Чбоскидің «Ғажайып» фильмі көрсетілді. «Ғажайып» фильмі өзгелерге жақсы адам (ата-ана, мұғалім, директор, сыныптастар) бейнесінде, оларды үлгі тұтуға және ертеңгі күнге үмітпен қарауды насихаттайды.
