Нұр-Сұлтан, BAQ.KZ. Алматы қаласындағы Мәжіт Бегалин атындағы №120 мектеп-гимназияда «Қазақфильм» киностудиясының қолдауымен белгілі кинорежиссердің 100 жылдық мерейтойына орай мерекелік концерт өтті, деп хабарлады киностудияның баспасөз қызметі.
Аталған шараға Мәжіт Бегалиннің туыстары – Гүлнәр, Айжан және Айдар Бегалиндер, КСРО халық артисі, Қазақстанның Еңбек Ері, киностудияның көркемдік жетекшісі Асанәлі Әшімов, деректі кино режиссері Болат Нүсімбеков, сондай-ақ «Қазақфильмнің» вице-президенттері Айдархан Әділбаев және Айдар Баталов қатысты.
Мәдени іс-шара алдында қонақтар Мәжіт Бегалиннің құжаттары, жеке заттары, наградалары, суреттері мен кейбір фильмдерінің постерлері сақталған мектептің музейін аралап, басқа да экспонаттармен танысты. Киностудияның вице-президенті Айдар Баталов режиссердің есімін ұлықтап жүрген ұстаздарға алғысын білдіріп, мектеп директоры Айсұлу Ботаеваға Шәкен Аймановтың фильмдері кірген DVD жинағын тарту етті, - делінген ақпаратта.
Қазақ кино өнерінің саңлағы Асанәлі Әшімовті мектеп оқушылары ұзақ қол соғып ерекше қошеметпен қарсы алды. Өз сөзінде танымал актер осыдан 10 жыл бұрын музейдің ашылуына қатысқанын еске алып, осындағы жәдігерлер режиссердің інісі Қасым Бегалиннің арқасында жиналғанын айтты. Сондай-ақ Асанәлі Әшімов Мәжіт Бегалин туралы естеліктерімен бөлісіп, мәдениетіміздің дамуына өлшеусіз үлес қосқан ұлы қайраткерлердің есімдерін ұмытпай, ұлықауға шақырды.
Мәжіт Бегалиннің 100 жылдық мерейтойына орай ұйымдастырылған осы шараға қатысқаныма өте қуаныштымын. Ол менен 15 жас үлкен болса да, бір-бірімізбен оңай тіл табыстық. Мәжекең маған көп затты үйретті. Өте мейірімді және білімді жан еді, тек қана шындықты айтуға талпынатын. Арамыздан ерте кетсе де, қазақ киносының тарихында үлкен із қалдырды, - деді Асанәлі Әшімов.
Мектеп оқушылары бүгінгі мерейтойлы кеште ән айтып, би билеп, өз өнерлерін паш етті. Кездесу соңында ұйымдастырушылар келген қонақтарға алғысын білдіріп, оларға гүл шоқтары мен естелік сыйлықтарды табыстады.
